La Liga: Champion thei team pali an awm!

European top five league zinga ngaihnawm ber chu La Liga a ni mek - Spanish top flight league-ah hian champion thei team pali an awm mek a, Atletico Madrid, Real Madrid, Barcelona leh Sevilla-te chu champion la beisei vek an ni!

Atletico Madrid-in table chung berah point 70 neiin hma an hruai mek a, palina Sevilla hian khelh zat inangah point 64 an nei thung - an inkarah point ruk chauh a awm a, Sevilla tan champion-a la beisei ngam. Sevilla hian zanin dar 10:30-ah league match khel turin Levante an lenchilh dawn a, pahnihnaa awm Real Madrid chuan zan dar 1:30-ah Cadiz an lenchilh thung ang.

Hmahruaitu Atletico erawh naktuk zan dar 10:30-ah an inlan dawn chauh a, Huesca an mikhual ang - Barcelona chu Ningani zan dar 1:30-ah an inlan dawn chauh bawk a, Getafe an mikhual dawn thung.

Beisei loh Sevilla
Sevilla hi season tirah khan tumahin champion thei zingah an dah lo - mahse league match sarih chauh khelh tur a awm meuh chuan he team hi champion thei zingah an tel ta a, zanin an inkhel pawhin ngaihven a hlawh ang.

Real Madrid boss hlui Julen Lopetegui enkawlna hnuaiah Sevilla hian hma an sawn a, an league match hnuhnung parukah tlawm an nei lo - vawi khat draw result an nei a, an hneh zingah Atletico Madrid (1-0) an tel. Sevilla-in dam kim chungin Levante hi an lenchilh dawn a, Youssef En-Nesyri chu mit fukna tur bik a ni leh ang - kum 23 mi striker hian tun season inelna hrang hrangah match 45 khelin goal 22-a khung tawh.

He team hian Argentine winger Lucas Ocampos, French defender ṭhangduang Jules Koundé leh midfielder tawnhriat nei ṭha Ivan Rakitic an kawl bawk a, an mikhualna ramah an chak a nih pawhin a mak lo ang.

Thawhlehna hun
Real Madrid-in Barcelona leh Liverpool an hneh hnu lawkah rin loh takin Getafe chu khualmualah 0-0 in an inhnehtawkpui a, champion nomawi an beiseina kawngah an kawng a harsat phah sawt.

Zaninah he team hian Cadiz an lenchilh leh dawn a, hnehna chan tawh an beisei ang - hriat tel tur erawh Cadiz hi lehkhaa an lan ang maia en chi an ni lo. La Liga kai thar team hian Real nen an intawn hmasakah khualmualah 1-0 in Zinedine Zidane-a team hi an lo barakhaih tawh a, zaninah mahni muala tlawm an tum lo ang.

Cadiz hian tun season-a Barcelona an hmachhawn vawi hnih aṭangin point li an hlawh chhuak thei bawk a, zanin inkhel tur hi Real tan 'thawhlehna hun ṭha' tia sawi ngawt a rem bik lo.

Hliam dinhmun
Real-in Getafe an inhnehtawkpui chhanah player inhliam, Covid-19 leh hrem an ngah chu an chhuanlam thei a, zanina Cadiz an lenchilh hunah erawh Getafe laka inlan thei lo player an lo kir nual dawn.

Tlarhnunga player pawimawh Nacho Fernandez leh midfielder Casemiro-te chuan hremna an tawrh zawh tawh avangin an inlan thei dawn a, hliam leh Covid-19 vanga a chawlh reng hnuin Raphael Varane-a awm tawh dawn bawk.

Real boss Zinedine Zidane-a'n Eden Hazard chu inkhel tura a inpeih leh tawh thu a sawi a, hetihrual hian Sergio Ramos, Lucas Vazquez, Dani Carvajal leh Ferland Mendy dinhmun a la chiang lo a, Covid-19 vangin Federico Valverde-a la inkhunghrang mek bawk.

Madrid khaw club-in an chhawr theih loh tur ringawt pawh hi team ṭha tak dinpui tham an ni a, chutihrual chuan league nomawi chawi duh tan hliam leh hrem hi chhuanlama hman reng chi a ni lo - fan-ten point thum hmuh an beisei ang.