Mason-a hnuaiah Spurs

Ryan Mason-a kaihhruaina hnuaiah zanin dar 10:30 hian Tottenham Hotspur-in Southampton an mikhual dawn. Zan dar 12:45-ah table chung bera awm Manchester City-in Aston Villa an tlawh bawk ang.

Spurs leh Man City te hian April 25, Pathianni hian League Cup final an khel dawn a, Carabao Cup final atana inpuahchahna ṭha tak a ni thei ang. Club pahnih hi European Super League-ah an tel avangin football expert ṭhenkhat chuan a hrem nan League Cup final hi khelh loh ni se an ti hial.

Mou thlaktu Mason
League Cup final khelh dawn ṭepah Jose Mourinho ban a ni a, Tottenham Hotspur-in thutlukna mak tak an siam niin lang mah se an result thlirin a awmna chen awm bawk.

Coach tawnhriat nei ṭha tak Mourinho thlak nan hian Spurs chuan coaching staff zinga mi Ryan Mason-a'n season tawp thleng a enkawl ang. Mason hi kum 29 mi chauh a ni a, Premier League-a kum 30 hnuai lam mi team enkawl thei hmasa ber a ni.

England international hlui Mason hian hliam vangin kum 2018 khan football khelh a chawlhsan a, hemi hnu hian coaching hna a ṭan nghal. Spurs hian point 50 hmuin pasarihnaah an awm mek a, Champions League khel pha china awm West Ham United chu point nga chiahin pha tawh lo mah se thutlukna an siam danah tun season-ah beisei an nei sang tawh lo niin a lang.

City tan chak a ṭul
Manchester City-in Premier League an champion chiang tawhah an inngai a, chutihrualin tun hnaia che ṭha Manchester United-in champion beiseina an rawn nei thar.

Pep Guardiola hoten Man United beiseina tihtawp sak turin Aston Villa hi an hneh a ṭul a, amaherawhchu City hian hliam vangin Kevin De Bruyne an chhawr thei dawn lo. City hian League Cup final leh Champions Legue khelh tur an neih avangin an ṭhat theih dan berin Villa hi an hmachhawn theih a rinawm lo a, chesual ve thei dinhmunah an ding.