European Super League (ESL) leh a kaihhnawih : Kum 2024 aṭangin UCL kalphung thar
UEFA chuan Thawhṭanni khan kum 2024 aṭangin Champions League kalphung thar a awm tur thu an puang a, team 32 awm ṭhin chu team 36-ah tih pun a ni ang.
Thawhṭanni khan Switzerland-ah UEFA executive meeting neih a ni a, hetah hian inelna kalphung thar hi pawm a ni. Team pali awm belh tura pakhat hi Europe-a league ranking-a pangana France-in an chang ang a, pathum dang thlan dan tur erawh tarlan a ni lo.
Champions League kalphung tharah hian chess inelnaa an hman ṭhin Swiss system an hmang dawn. Team 36 chu pot liah pakua zelin dah an ni ang. Team tin hian team 10 ṭheuh an hmachhawn ang a, match nga hi an mualah an khel ang a, match nga dang hi khualmualah an khel ang.
Phase khat a zawh hian team 36 zinga a sang pariat chu last 16 khel turin an tling ang a, a hniam 12 te erawh an tla ang. Pakuana aṭanga 24-na te chuan double legged playoff hmangin hmangin last 16 lut tur team pariat dang an zawng ang.
Playoff-a chak zawk team pariat hian last 16 an khel ang a, a chak lo pariat hi Europa League-ah an tla thung dawn a ni.
ESL Thlirna Tawi
Team tel (12) :
Premier League club (6) - Manchester United, Manchester City, Liverpool, Arsenal, Chelsea leh Tottenham; La Liga club (3) - Real Madrid, Barcelona leh Atletico Madrid; Serie A club (3) - Juventus, AC Milan leh Inter Milan.
Tel duh lo :
PSG, Bayern Munich, Borussia Dortmund, FC Porto
League hruaitute
Chairman Florentino Perez, Real Madrid
Vice-Chairman Stan Kroenke, Arsenal
Vice-Chairman Andrea Agnelli, Juventus
Vice-Chairman John W. Henry, Liverpool
Vice-Chairman Joel Glazer, Manchester United
Inelna kalphung tur
• ESL-ah hian team 20 an tel dawn. Team 15 hi league dintu an ni ang a, team nga dang thlan dan tur hi league dintute kutah a awm.
• Team dintu hi 12 chiah an la awm a, pathum dang hi a la hriat loh.
• Inelna hi August thla aṭanga ṭan tur a ni a, kar laihawlah (midweek) khelh ṭhin tur niin remchang hmasa bera ṭan tura sawi a ni. Tuna a lan dan chuan 2021-22 season chu ai mahin 2022-23 season vela an ṭan a rinawm.
• Team 20 hnih hi group hnihah team 10 ve ve in an awm ang. Heta ṭang hian a ti ṭha pathum ve ve chuan quarterfinal an lut nghal ang. Hmunruak pahnih hi group pahniha 4-na leh 5-na ten playoff (double leg) hmangin an zawng ang.
• Quarterfinal aṭang hi chuan Champions League kalphung pangngai angin home leh away hmangin chak zawk zawn a ni ang a, final hi neutral venue-ah single leg-a khelh a ni ang.
Eng nge an sawi?
Tuna kan buaina hi thil thar a ni lo. UEFA president Lennart Johansson khan European football chhanin Champions League thar a buatsaih. Europe ram aṭanga team khat chauh tel ṭhin kha England, Spain leh Italy aṭangin team li an tel. Tunah pawh hian Super League siam tum ai chuan dawhkana sawifel a ṭha, tuna Champions League tih ṭhat dan tur hi sawiho a ṭul a ni. - Sven-Goran Eriksson, England manager hlui
Inelna thar buatsaih tura rawtna thar rawn awm hi ka duh lo a, hmalak theih dan hrang hrangte kan thlirho ang. Sorkar leh football thuneitute ṭangkawpin a kaltlang lohna turin theihtawp chhuahin hma kan la ang. Football fan-te leh kan ram football tan a ṭha lo.- Boris Johnson, British prime minister
Super League hi kum 70 chuanga hlawhtling taka kalpui tawh European football aṭanga kal bona a ni. Player ka nih laiin 1960 chhoah Dunfermline tan Cup Winner's Cup-ah ka khel tawh a, ka manager-na hnuaiah Aberdeen ka champion pui leh bawk. Scotland-a khaw te reuhte tan chuan Mount Everest lawn tluka harsa a ni. Everton-in pound maktaduai 500 senga stadium sak ṭhat an tum chhan hi Champions League khelh an duh vang a ni. Fan-te pawhin inelna hi a nihna angin an ngaina. United-ah pawh khan Champions League final ṭum li kan khel a, ka tan chuan zan duhawm tak vek a ni.- Sir Alex Ferguson, Manchester United manager hlui
December 2020 khan ka sawi tawh. Florentino Perez hi hriatthiam a har a, amah hi a bo a ni. A sawi ang hian football hi a la chhe lo a, Super League hi buaina siamtu leh football tichhetu zawk a ni. - Javier Tebas, La Liga president
European football kalphungah buaina leh ṭhat tawk lohna lai hai chhuah a ni a, European football hi dinhmun derthawngah a ding tih kan hriat a ṭul a ni. - Thomas Bach, International Olympic Committee president
Kan ram aṭanga Super League khel an awm lo hi ka lawm a, kan ram club-te hi ka chhuang takzet a ni - Rainer Koch, German FA vice president