Champions League khelh chhunzawm a ni zel dawn - UEFA president

UEFA president Alexander Ceferin chuan European Super League (ESL) dintu club 12 tel emaw tel lo emaw pawhin Champions League khelh chhunzawm a nih zel tur thu a sawi.

ESL hi kaltlangpui a nih chuan he inelna thara telte hian Champions League an khel thei dawn lo a, hei hian UEFA hnuai inelnaah nghawng lian tak a nei dawn.

Kum 53 mi Ceferin chuan, "Khaw êng pawh hmu zah lo a, mahni hmasial taka rawtna siamtu lakah hian midang zawng hi kan inlungrual hle. An thil tum dan hi football kalh a ni a, an tum hi tih hlawhtling kan phal lo ang.

"ESL-a khel player-te chu World Cup leh Euro-ah an khel thei lo tura hrem an ni ang. An thil tum an tih hlawhtlin loh nan hian kan ṭanrual a ṭul a ni," tiin UEFA hriatpui loh inelnaa telte chu an hrem tur thu a sawi.

Champions League chungchang zawhna chhangin Ceferin chuan, "Kan khel chhunzawm zel dawn. Europe-ah hian club ṭha leh ṭantu rinawm tak tak nei an tam. Club 12 tel emaw tel lo emaw Champions League hi a kal chhunzawm zel ang. Kan hriat ṭheuh angin inelna kalphung pawh kum 2024 aṭang chuan a danglam ang," tiin a sawi.

Club 12-ten thutlukna maksak tak an siam a, UEFA president pawhin ṭawngkam a duh tui lo. Ceferin chuan, "Club 12 te hian an nihna tak an pholang a, club dang an pawisa lo tih a lang. An hausak tawh tehluh nen hausak belh dan tur an la ngaihtuah a ni.

"Football hi heng club ṭawp tak 12 lakah hian hralh a ni dawn lo. Tuna club lian kan tih te hi club lian an reng lo. Juventus hi Serie B-ah an awm tawh, Manchester United hi Sir Alex Ferguson-a hma khan khawiah nge an awm ka hre lo. Aston Villa pawh club lian an ni ṭhin. Hetia an tih chhan chu an team inenkawl dan dik loh vang a ni," tiin ESL dintu club-te a dem thu a sawi.