Football chhanchhuahna atan duan a ni - ESL chairman

European League Super (ESL) chairman Florentino Perez chuan ESL chu football chhanchhuahna atan duan a nih thu a sawi. Real Madrid president hi inelna thar duanna kawnga a thluak bur bera ngaih a ni.

Kum 74 mi Perez chuan, "Thil thar a awm hi chuan dodaltu an awm ṭhin. Inelna thar kan buatsaih chhan chu hun harsaa football chhanchhuah nana kan tih a ni," tiin na taka demna karah football hmangaihna vang a nih thu a sawi.

Perez chuan, "Champions League hi tuna a kalphung ang a kan kalpui chhunzawm zel chuan inelna ngainatu an tlem tial tial ang a, ngaihventu awm loh vangin a la tawp ang.

Kum 2024-ah inelna kalphung thar a awm dawn a, kum 2024-ah chuan Champions League leh he inelnaa tel zawng zawngte hi a tawp dawn. Kum 1950 chhoah khan UEFA leh FIFA khan European Cup kha an sawisel a, mahse kha inelna kha football tidanglamtu chu a ni," tiin a ṭan chhan a sawi chiang.

ESL dintu club 12 te hi Covid-19 vangin an sum lakluh a tlahniam vek a, kum 2019 leh 2020-a an sum lakluh thlirin pound maktuduai 30 chuang vekin an sum lakluh a tlahniam. Manchester United sum lakluh tlakhniamna phei chu pound maktaduai 148 zet a ni.

Europe club lian te hian sum tam tham tak lakluh chhunzawm zel an duh a nih chuan inelna thar hi an mamawh. ESL-ah hian club pakhat dawn tur ringawt pawh hi euro tluklehdingawn 3.5 a ni a, club-te tan pawh itawm tham a tling.

Perez chuan, "Television aṭanga chauha sum lakluhna a awm a nih chuan kawng dang kan zawn a ṭul. Fan-te ngainat inelna kan buatsaih a ṭul a, khawvel hian club lian inkhel hi an hmu châk a ni. Ṭhalai tam tak hian football an tui tawh lo a, thil dang ngaihven an nei. Hemi a nih avang hian pawisa tamna tur inelna buatsaih hi a ṭul," tiin a sawi.

Football thuneitute kap zuiin Perez chuan, "Engvangin nge UEFA leh La Liga hruaitu hlawh hi tarlan a nih loh. Mi zawng zawngin an hlawh an tih hniam laiah ti nge an hlawh ngai reng an lak bik. LeBron James-a hlawh kan hre vek a, UEFA president hlawh kan hre lo, tun aia lang tlang hi kan duh," tiin sum chungchangah rin ngam an har thu a sawi.

Real Madrid president hian UEFA hnuai inelnaa hlawhtlinna chan chuan euro maktaduai 120-130 a lakluh theih a, amaherawhchu Super League aṭangin a aia tam an lakluh theih tur thu a sawi.