ESL club-te chungah hremna an lekkawh dawn em?

Champions League leh Europa League semifinal chu karleh mai khian khelh a ni dawn. UCL-ah hian European Super League club pathum Real Madrid, Manchester City leh Chelsea te an awm a, Europa League-ah Manchester United leh Arsenal te an awm bawk.

UEFA hian ESL-a tel club-te hi an hrem a nih chuan tun season-a Europe inelna lian pahnih hi holam takin a tawp thei ang. UEFA president Aleksander Ceferin chuan club 12 hi remchang hmasa bera hrem a duh thu a sawi chhuak tawh a, semifnal khelh hmabak atan pawh hian dan hre mi te nen an sawiho bawk.

Tun dinhmunah chuan UEFA hian ESL dintu club-te hi an hrem nghal a rinawm lo a, chutihrualin Ceferin hian ṭan chhan an neih chuan hrem theih dan a awm tur thu a sawi.

Hei chauh hi ni loin Ceferin hian ESL-a telte chu World Cup leh European Championship-ah ram aiawha an tel theih loh tur thu a sawi. Amaherawhchu ESL chairman Perez chuan, "Real Madrid, Chelsea, Manchester City, Manchester United, Arsenal te hi semifinal khelh lo tura hrem an ni dawn lo. A theih loh, 100% in ka chiang," tiin UEFA-in kumina UCL leh Europa League semifinal-a hremna an lekkawh loh tur thu a sawi.

Perez hian ram inelnaah pawh hremna hi lekkawh a nih loh tur thu a sawi a, UEFA leh FIFA nge huai zawk dawn ESL chairman hi tih chu hunin a la hril ang.