Big Six an la ṭang rual

Premier League big six tiha chhal Manchester United, Manchester City, Liverpool, Arsenal, Chelsea leh Tottenham te chuan sawiselna karah European Super League zawm turin an la ṭangrual.

BBC sport writer Simon Stone chuan, "Club thuneitute ka biak kualna aṭangin English club parukte hian ESL aṭanga inhnuhdawh tumna an nei lo. An thlirna aṭang chuan an hmalakna hi hun rei tak an ngaihtuah tawh a, football-in a hlawkpui an ring. Club-te hian sawiselna boruak daih hun hi an nghak," tiin a sawi.

English club-te hi an inhnuk hniam duh lo a nih chuan UEFA emaw FA emaw football thuneitute dangten an thuneihna an lekkawh a ṭul dawn a, thil awm zel dan tur hriatthiam a har ta hle.