Bucks lakah Phoenix an chak

Nimin zing NBA regular season inkhelah Phoenix Suns chuan Milwaukee Bucks lakah 128-127 in hnehna an chang a, team pahnih hi hun pangngaiah inhnehtawkin overtime an khelh hnuah Phoenix an vannei zawk.

Team pahnih an inkhel tawk takzet, overtime zawh nan 0.3 second chauh a awm tawh tihah Devin Booker chuan free throw a hlawh chhuak a, hetih lai hian a team Phoenix chu point khatin an hniam.

Booker-a'n a free throw hlawh chhuah a hmang ṭangkai a, point hnih neih belhin chak lo tur anga an lan hnuah point khat lekin an sang ta zawk.

Suns an chak theih nan Chris Paul a pawimawh bawk, ani hian point 22 a neih bakah assist vawi 13 a nei - Magic Johnson khumin NBA huanga assist nei hnem pangana dinhmun a luah.

Bucks tan nidang ang bawkin Giannis Antetokounmpo chu an player pawimawh leh ṭangkai a ni. Greek tlangval hian point 33 a neih bakah rebound vawi riat a la, mahse thlawptu a neih ṭhat tawk loh bakah nidang a point neih tam ṭhin ang kha a phak bik lo bawk.

NBA champion lai Los Angeles Lakers pawh LeBron James leh Anthony Davis tel lo chuan an che fuh thei lo. Lakers hi Utah Jazz lakah 111-97 in an tlawm a, regular season kal laiah vawi 23 ngawt an tlawmna a ni ta.

Hnehna changtu Jazz erawh vawi 43 zet an chak ta, Western Conference hmahruaitu hi NBA regular season kal laia chak hnem ber an ni. Jazz hnaih bertu Phoenix Suns hi vawi 41 an chak ve thung a, anni pahnih hi chu playoff khel tura chiang tawh tluk an ni.

Nimin zing regular season inkhel dangah - San Antonio Spurs, Miami Heat, Washington Wizard leh Memphis Grizzlies te chuan an khingpui ṭheuh an hneh ve bawk.