England tan Sterling a vul

'Golden Generation thar' tia an sawi England chuan an chunga beiseina a san chhan an pholang leh ta a, Euro 2020 qualifier-a an match hmasa berah 5-0 in Czech Republic an sawp.

Raheem Sterling chuan Three Lions jersey hak a phu tih pholangin a thiam thil a 'show' a, goal thum ngawt khungin hattrick a siam - Harry Kane chuan goal khat a thawh ve bawk a, Czech defender Tomas Kalas chuan an lamah a ti lut bawk. Hattrick siamtu Sterling chuan, "Ka phur em em a, ka seilenna hmun ngeia he hun ka tawng hi ka lawm hle. Hei ngei hi ka mangphan chu a ni a, a takin a thleng ta," a ti.

England hian zanin dar 1:15-ah qualifier-a an match hnihna an khel lehnghal dawn a, mikhual ramah Montenegro an lenchilh ang. Czech laka inhliam Eric Dier a inlan thei dawn lo.

A hming Sterling
England-in goal li khung turin minute 70 aia tlem an mamawh a, an goal khung hmasak pali-ah hian Sterling hi a inrawlh vek - minute 24-na lekah Manchester City forward hian goal hmahruai a khung.

First half hun pek belh a ni a, Sterling bawk kan hmu nawn. Czech defender pahnihin an chuh hneh loh avangin an ti tlu a, penalty a hlawh chhuak. Harry Kane chuan penalty hi harsatna nei loin goal-ah a chantir. Sterling hian minute 62-na leh 68-naah goal a khung leh a, minute 70-naah a aia Callum Hudson-Odoi luhtir a nihin standing ovation nen fan-ten an thlah.

Kum 24 mi forward hian club lamah pawh season duhawm tak a hmang mek a, City tan inelna hrang hrangah goal 19 a khung leh der tawh - season hmasaa a goal khung zat goal 23 khung turin goal li bak a mamawh tawh lo.

Hmabak a êng
England tan rawlthar duhawm Jadon Sancho chuan theihna nei sang tak a ni tih pholangin Sterling goal khung tur kha sawisel tur awm lo khawpa ṭhain a siam sak - kum 18 mi chauh a la ni.

Three Lions tana a vawi khat nana inlan Odoi a khel chhe lo a, ram tana a inlan hmasak berah goal a thawk chhuak nghal - a goal shot chu keeper Jiri Pavlenka chuan dang hman mah se a per lehlam hi Tomas Kalas chuan an lamah a ti lut. Kum 20 mi, West Ham defensive midfielder Declan Rice chuan ram tana a match hmasa ber khelin a inlan bawk a, a khel chhe lo. England squad an naupang tlang a, hmabak a êng hle.

Goal thum khungtu Sterling pawh kum 24 chauh a la ni a, captain Kane pawh kum 25 chauh a la ni - hetichung hian rawlthar duhawm tak tak Trent-Alexander Arnold, Joe Gomez, Marcus Rashford, Jesse Lingard, Luke Shaw leh John Stones te chu hliam vangin an la inlan lo mah mah!

Southgate a hlim
Goal nga ngawt khungin an chak a, England coach Gareth Southgate tan lawm lohna chi a ni lo.

English manager hian goal thum khungtu Sterling fakin, "Training-naah pawh khati bak kha a ni chuang lo. A khel ṭha em em reng a, a tan chuan zan duhawm a ni," a ti.

Southgate a ṭawng fimkhur zui a, hmabak nei êng tak a naute ven uluk a ṭul thu a sawi. World Cup semifinal-a England hruai thlengtu chuan, "Sir Alex leh Ryan Giggs kha ka ngaihtuahnaah an lo lut fo ṭhin. An inkaihhruaina ṭha tak khan hlawhtlinna tam tak a thlen a ni.

"Kawng engkimah kan fimkhur a ṭul a, mipui vantlang bawr tur leh sumdawnna thila an inhman dan kawng thlengin ruahmanna siamsak a ṭul a ni," tiin a sawi.