Hungary mualah Croatia an mualpho

World Cup finalist Croatia chu chak ngei tura ngaih an nihna hmun Hungary-ah an mualpho a, khualmualah 1-2 a tlawm chungin an haw.

Croatia hian Euro 2020 qualifier-a an match hmasa berah Azerbaijan chu 2-1 in an hneh hram a, Hungary lakah an tlawm zui - Ante Rebic chuan goal hmahruai khung zet mah se Hungary hian Adam Szalai leh Mate Patkai hmangin an chhanglet.

Nikum lawka World Cup final hial khel thei team tan international break theihnghilh tlak a ni a, Euro 2020 qualifier Group E-a team panga zingah palina an ni mek.

Group E inkhel dangah Wales-in hnehna an chang thung a, an mikhual Slovakia chu Dan James goal khung hmangin 1-0 in an hneh.

Beisei loh result
Croatia-in inkhel ṭan aṭanga minute 13-na lekah goal hmahruai an khung a, Hoffenheim forward Andrej Kramaric-a ball pek duhthusam chu Eintracht Frankfurt tana khel Rebic chuan harsatna nei loin goal-ah a chantir.

World Cup finalist-in goal an khung hmasa miau a, team pahnih player khaikhina an inthlauh bawk avangin chak ngei tura ngaih an ni. Mahse, beisei ang ngawt erawhin a kal lo. Budapest khawpuia Groupama Arena-ah Hungarian fans thawm a ring a, khualmualah Croatia an zamral - Hoffenheim striker Adam Szalai chuan si phurh a rawn sut.

Hungary-in an la duhtawk mai lo. An ram club Vidi tana khel mek Mate Patkai chuan minute 76-naah chakna goal a rawn khung a, Croatia-in an si phurh suttu tur an nei tawh lo.

Croatia mualphona
World Cup finalist team hian Hungary an hneh loh chhanah chhuanlam tur an nei lo - an ṭhat dan berin an khel.

Midfield-ah Luka Modric leh Ivan Rakitic an la inkawp thei a, tlarhmaah Rebic leh Kramaric thlawp turin Ivan Perisic leh Marcelo Brozovic an la nei cheu a, tlarhnungah nise Dejan Lovren an la nei. World ranking-ah ni se Hungary hi 52-na chauh an ni a, Croatia nen an inkarah team 48 ngawt an awm - Croatia hi world ranking-ah chuan palina an ni mek.

Hun tawp lamah Hungary hian goal khung theihna remchang dang an nei zawk a, goal line aṭangin Croatia hian vawi thum ngawt ball an pet chhuak. Hungary tana sawi hmaih thiang lo chu captain Balazs Dzsudzsak a ni a, ram tana a match 100-na kheltu hi a khel ṭha takzet.

Wales an chak
Ryan Giggs enkawlna hnuaiah Wales-in hnehna an chang a, Euro 2020 qualifying round-a an match hmasa berah an mikhual Slovakia chu 1-0 in an hneh.

Wales tan Dan James chuan minute ngana lekah goal hmahruai a khung a, kum 21 mi Swansea City winger James hian ram tana goal a khung hmasak ber a ni a, yard 20 vela hla aṭanga ṭha zeta a khung a ni. Goal a lut hma viau chungin goal dang erawh kan hmu tawh lo a, mikhual team Slovakia-in Albert Rusnak leh Robert Mak hmangin si phurh sutna remchang nei mah se goal-ah an chantir thei lo.

Wales manager Ryan Giggs chuan, "Player upa leh naupang rual an inchawhpawlh mawi tawk a, kei chuan goal chhuah loh kha ka duh ber a ni. Talent nei ṭha tak tak player kan kawl nual a, hun duhawm kan nei zel ang," tiin a naute a ringtawk hle.

Group E - March 24, Pathianni
Wales 1 - 0 Slovakia

Zanin Inkhel Tur
Group D
Switzerland 01:15 AM Denmark
Republic of Ireland 01:15 AM Georgia
Group F
Malta 01:15 AM Spain
Norway 01:15 AM Sweden
Romania 01:15 AM Faroe Islands
Group J
Italy 01:15 AM Liechtenstein
Bosnia-Herzegovina 01:15 AM Greece