Point hloh a thiang lo - Gattuso

Zanin dar 12:15 hian Napoli chuan Serie A match khel turin Lazio an mikhual dawn a, mikhual thleng tur Gennaro Gattuso chuan season thara Champions League khelh tum tan point hloh a thiang lo tih a sawi.

Italian Serie A-ah team paliin UCL khelhna an inchuh na hle. Champion lai Juventus chuan point 62 hmuin palina dinhmun an luah a, an chunga awm Atalanta an phak lohna chu point hnih chauh a ni.

Old Lady dinhmun hi a him bik lo, pangana Napoli nen an inthlauhna chu point hnih bawk a ni a, paruknaa awm Lazio pawhin point 58 nei tawhin European football inelna sang ber an la beisei ngawm ve bawk.

Napoli manager Gattuso chuan, "Inelna sang leh hautak hma-chhawn hi tun hma aṭangin ka nuam tih zawng tak a ni. Season tawp dawn lamah na takin kan inum mek a ni a, hetiangah hian chiai loa inkhel hmachhawn theih a pawimawh.

"Khelh hmabak pasarih ṭheuh kan la nei a, final anga pawimawh vek a ni. A bik takin kan elpui nena kan inkhelh tur hi chu 100% chunga kan ṭan a ngai dawn a, point hloh ṭhen zeuh pawh a thiang tawh lo," tiin a sawi.

Zanin dar 10:00 hian pasarihna AS Roma chuan Juve hneh hlim Atalanta an mikhual bawk dawn, inkhel hmuhnawm a beisei ngam ang.