Ni tla seng loa roreltu England

Euro 2020 qualifier-a England-in match an khelh tawh zat chu match hnih a ni a, goal an khung tawh zat erawh goal 10 a ni a, an lamah goal khat chiah a la lut thung!

England tan Wembley Stadium leh Montenegro khelmualin danglamna a nei lo a, an mikhual Czech Republic 5-0 ngawta an sawp hnuah an mikhualna ramah Montenegro chu 5-1 in an sawp zui leh ta. Great Britain ropui vanglaia 'Ni tla seng loa roreltu' tia an lo sawi ṭhin chu tuna England football team dinhmun hrilhfiah nana awlsam ber a ni a, an hmaa ding an awp zel.

Three Lions tan hian Ross Barkley chuan goal hnih a khung a, Michael Keane, Harry Kane leh Raheem Sterling te chuan goal khat ṭheuh an khung bawk.

A harsa lo
England-in an mikhualna ramah goal an chhuah hmasa zawk a, Legia Warsaw right back Marko Vesovic chuan Jordan Pickford tana tih ngaihna awm miah loin ṭha zetin goal a khung.

Czech laka goal nga khung zo hlim England hian mi tam tak nuih an ti za hman a, Inrinni zana an goal nga khung kha vanneih vang chauh a nih thu sawi chak ten an ṭan chhan tidiktu tur an hmu niah an ngai.

Mahse, chutiang a ni hauh lo. England an ṭang sawt a, an si phurh sut turin hun an duh rei lo. Everton defender Michael Keane chuan Barkley freekick aṭanga ball kal chu minute 30-naah si phurh sut nan a tauh lut.

Minute riat a liam a, Barkley hun a inher chhuak - an goal hnihna a khung zui a, second half minute 59-naah an goal thumna leh a goal hnihna a khung leh bawk.

Ngawi rawh u!
England inkhelhna hmun Montenegro hi vun rawng avanga inthliarna nasatna hmun a ni a, inkhelh chhung zawng hian mi hang ten diriamna leh auh elna an tawk nasa hle.

Mahse minute 71-naa Kane-a'n an goal lina a khung hnuah Sterling chuan vun rawng avanga amah auh eltute a chhanglet a, minute 80-naah England goal ngana a khung. Manchester City forward hian a beng bulah a kut pahnih dah chungin a goal khung hi a lawm a, hei hi Montenegro fan-te tih elna atana ti a nih thu inkhelh zawhah a sawi.

Sterling chuan, "Min hawtute ngawih tir dan ṭha ber a ni," tiin thlalak nen a goal khung lawm lai hi twitter-ah a tarlang a, "Mi a ṭhenkhatin zan hlimawm tak chu holam takin an chhuah a, hrem an phu a ni," tiin inkhelh banah a sawi zui.

Hello UEFA
England-in ropui takin hnehna an chang a, mahse vun rawng vanga an player-te hmuhsit an nih miau avangin hna dang tih tur an la nei - UEFA lakah an zualko dawn.

Three Lions coach Gareth Southgate chuan, "Pawm thiam harsa tak a ni a, Danny Rose-a'n yellow card a hmuh laia an au dan phei chu chiang takin ka hria a ni. "Kan player-te hian an lamah kan ṭang tlat tih an hriat ka duh a, team pumpui leh staff ten kan player-te thlavang hia kan hauh tlat a ni.

"Thil thleng chiang tak a ni tih ka hriat avangin UEFA-ah kan kal dawn a, thuneituten hma an lakna turah kan rinna kan nghah a ṭul a ni," tiin a sawi.

England an ṭha
Sawi nawn a ngai leh ṭhin - England hma hun a eng a, beiseiawm rual an kawl player-ten tun thleng hi chuan beiseina an la ti hlawhtling zel.

Montenegro-ah a vawi khat nan Declan Rice leh Hudson-Odoi ten inkhel bul an ṭan a, an khel ṭha takzet - Chelsea winger Odoi hian Montenegro tlarhnung vawi tam a chhaih mangang a, Barkley goal khung hmasak ber hi a shot aṭanga kal a ni. West Ham midfielder Declan Rice sawi hmaih a thiang lo. Kum 20 mi midfielder hi ram tana inkhel bul a ṭan hmasak berah a khel a puitling em em a, hlauthawng hauh loin 'cool' tak leh ṭha takin a khel thei.

Barkley-a'n theihna sang tak a nei tih a pholang a, Czech laka hattrick siamtu Sterling lah a kum telin hma a sawn tih a chiang a, auh elna karah pawh buai loin a khel ṭha takzet.