Gopichand hoin Trainers Training ṭan

India chief national coach Pullela Gopichand chuan Thawhṭanni khan world class level High Altitude Training Centre (HATC), Sihphir-a sak tur hmunhma a rawn endik a, sports minister Robert Romawia Royte nen an inkawm. Gopichand hian hemi ni vek hian ni li awh tur Trainers Training a hman pui nghal bawk.

High Altitude Training Centre hi Tata Trusts, Mizoram Badminton Association, Mizoram Sports Council leh Gopichand Academy te ṭangkawpin an siam tur a ni a, an zawh hun tur hi hriat a la ni lo.

Kum 45 mi Gopichand hian India ram badminton-ah danglamna a thlen a, Indian shuttler ṭha Saina Nehwal, P. V. Sindhu, Srikanth Kidambi, Parupalli Kashyap, Prannoy Kumar, Sameer Verma leh B. Sai Praneeth bakah player ṭha dang tam tak chher chhuaktu a ni.

Nimin khan Gopichand hian Mizoram hi a chhuahsan a, coach 40 telna Trainers Training hi Gopichand Academy-a chief coach Rajinder Sharma leh a thawhpuiten an enkawl chhunzawm ang.

Tata Trusts leh MBA ṭangkawpin Grassroots Training hmun hrang hrangah an kalpui mek a, heta tiṭha naupang 20-25 vel chu Regional Development Centre-a awm turin an thlang chhuak ang.

Mizoram badminton hian awmze neia hmasawn theih ruahmanna ṭha tak 'Badminton Initiative' tih an duang tawh a, tunah hian kalpui chho mekin Sihphir-a awm tur HATC chu a ṭha bikte inzirna tur a ni.