Federer-a'n last 16 a lut

Roger Federer chuan world number 103 Filip Krajinovic hnehin Miami Open last 16 a in vaw kai a, Swiss tlangval hian tukin zingah hian seeded 13-na Daniil Medvedev a hmachhawn leh ang.

Nimin zing inkhelah Grand Slam vawi 20 champion tawh Federer-a'n Serbia tlangval Krajinovic lakah hian 7-5, 6-3 in hnehna a chang. Inkhelh tir lamah che fuh tawk loin unforced errors ṭum 23 ngawt nei mah se winners ṭum 35 vaw chhuakin a tihsual a siamṭha thei.

Kum 37 mi Federer hi a service a la ṭha pangngai reng a, a service hmasa aṭangin 74% zet point hmuin vawi 14 aces a siam. Tun season chhung bikah ATP Tour match 14-ah hnehna chang tawhin vawi hnih dang chu a tlawm thung.

Federer-a hmachhawn leh tur Daniil Medvedev hian feet 6 leh inches 11 zeta sang Reilly Opelka chu 7-6 (5), 6-7 (5), 7-6 (0) in a hneh ve bawk. Federer tan khingpui hautak a ni thei tura ngaih a ni, tun hma vawi hnih an intawn tawhnaah Federer-a'n hnehna a chang ve ve a ni.

Mimai Open vawi thum champion tawh Federer chuan, "Ka service a fuh ṭhin a, Filip khan rawn vuak let harsa a ti ve hlein ka hria. Service hmasa hi a nat bakah a tlakna tur dik taka a tlak ṭhin chuan inkhelh a awlsam phah.

"Game hmasa lam 10 kha chu a awlsam bik lo, minute 20 chuang kan inkhelh hnuah erawh a nih dan tur dik takin thil a kal leh thei tawh a, ka inkhelah hmasawna hmuh tur a awm zel avangin a lawmawm. Season duhawm ka hman chhunzawm theih ngei ka beisei," tiin a sawi.

Inkhel dangah Kevin Anderson chuan Joao Sousa lakah 6-,7-6(6) a hnehna changin last 16 a inhlangkai ve bawk. South African tlangval hian aces vawi 13 a vaw chhuak a, double fault vawi khat chauh neiin a khel ṭha hle.

Seeded parukna Anderson hian a match lehpekah chuan Jordan Thompson a hmachhawn dawn. Seeded pawh chang phak lo Australian tlangval Thompson hian Grigor Dimitrov chu 7-5, 7-5 in a hneh.

Miami Open-ah hian world number 1 Novak Djokovic pawhin last 16 a inhlangkai tawh a, world number 2 Rafael Nadal erawh hliam vangin a inlan lo. Spanish tlangval hi April thla a khelh tur Monte Carlo Open-ah chuan inlan tura beisei a ni.