Vawiin NECS Cup Semifinal 2nd Leg

27th March, 2019

Khua leh veng inelna NECS Cup-ah team li chiah an dam tawh a, vawiinah final khel tur a hriat dawn. Chawhma dar 11:00-ah 2005 champion Armed Veng leh Lengpui an inkhel ang a, chawhnu dar 1:00-ah vawi thum champion tawh Ramhlun South leh Republic Veng an inhmachhawn ang. Champion tawh team hnih hi first leg-ah goal khatin an hnufual ve ve a, second leg-ah thawhchhuah an tum dawn a ni.

Attacking Football
Football inelna hmawr bawkna chu final a ni a, amaherawhchu nomawi inchuhna inkhel hi boruak a san tawh ṭhin avangin a hmuhnawm ber a ni bik lo. Team nem zawk an awm a nih chuan defensive game an khel a, team ṭha zawkin an nawr ngam loh phei chuan boruak sang tak chungin inkhel a hmuhnawm loh.

Hei vang tak hian semifinal inkhel hi a nung zawk ṭhin a, NECS Cup semifinal pawh a danglam lo ang. Team pali enkawltuten attacking game an khelh tur thu an sawi vek a, first leg-a goal dinhmun thlirin mipui hip nana sawi ringawt an ni lo ang.

Lengpui an phur
Tunlaia Lengpui khawtlang titi ber chu football a ni a, an la chawi ngai loh 'NECS Cup nomawi' la thei dinhmuna an din avangin an phur hle.

Coach RK Hmingthansanga kaihhruai team hian CYMA Football 2015 final-a an hneh loh Armed Veng lakah 1-0 in hma an hruai mek a, an squad a ṭhat bawk avangin beiseina an nei sang hi a mak lo.

Lengpui coach Hmingthansanga chuan, "Goal khat chauhin hma kan hruai a, a him loh zia kan hria. Chuvangin goal venhim hi kan la ngam lo a, khung belh kan duh. Tun hmain Armed Veng lakah hian vawi hnih ka chak lo tawh a, tun ṭumah hian vawi hnih hneh kan duh," tiin chak an tum thu a sawi.

Lengpui hian Aizawl FC forward F. Lalremsanga an kawl a, ani hi Lalchhuanmawia, Lalrokima leh Larry Lalrinawma ten an thlawp a; midfield laiah captain Joe Zoherliana leh veteran midfielder Rohmingthanga te awm bawkin Armed Veng hneh nawn turin an ṭha tawk.

Beiseina nung nei Armed Veng
Armed Veng coach Lalbiaksanga Colney chuan, "Minute 90 khelh tur a la awm alawm, kan lehthal theih hi kan ring tlat. Chumi tur chuan a tir aṭangin tlarhnung ngaihthah si loin kan nawr dawn," tiiin Vanglaini a hrilh.

BS-a Colney leh a naute hian inelna boruak sang an khel hnem tawh a; he team-ah hian Lalfakzuala, Lalbiakhlua, B. Zoramthanga, Lalmuanzova leh Vanlalduatsanga te an awm avangin second leg hi a hmuhnawm dawn. Armed Veng hian tualchhung football-ah sulhnu an nei ṭha a, CYMA Football-a vawi nga champion tawh veng hi NECS Cup vawi khat chiah an la champion avangin nomawi lak belh an duh ngei ang.

Boruak ṭha Republic Veng
Republic Vengin CYMA Football 2008-a final an thlen hnua a vawi khat nan semifinal an lut a, team enkawltu Local Council leh RGSA chauh ni loin veng mipuiin an football team hi an thlawp ṭha hle.

Coach PC Lalnunsiama chuan, "Kan thlen chin hi kan lawm a, mah se kan la duh tawk lo. Bul kan ṭan tawh a, veng mipui puihna nen a tawp thleng thlen kan duh. Ramhlun South hneh ngei hi kan duh a, chumi tur chuan attacking football kan khel leh ang," tiin a sawi.

Republic Veng hian match tinin hma an sawn a, Model Veng an hneh ṭuma an khel leh Ramhlun South nena first leg an khelh dan a inthlau tawh hle. Mipui lamin an hla pui anga, 'Kan zui leh mai phawt mai ang che awle' tichunga football team hi an zui tak tak ngam a nih chuan final thleng turin an dinhmun a ṭha hle.

Ramhlun South an ṭha

Ramhlun South goal khatin hnufual mah se dah bo theih an la ni lo a, first leg lama beisei pha lo Malsawmfela hi a khelh ṭhat niah chuan danglamna thlentu a ni thei a, second leg-ah hian a nau Vanlalthlamuana a khelh theih tawh a rinawm a, an unau pahnih dang Lalnunmawia leh Eric Pazawna nen pali ṭhawtin an inlan a nih pawhin a mak lo ang.

Coach Danny Lalduhawma chuan, "First half-ah khan goal khung kan inbeisei lutuk a, kan khung tak loah khan goal kan duh luatah second half-ah khan kan talbuai deuh a ni. Uluk takin kan khelh dan kan en let a, second leg-ah ṭan phat aṭangin na takin kan nawr dawn. Kan goal khat ba bakah hian goal dang kan khung belh ang," tiin thawhchhuah an tum hle.

Ramhlun South hian first leg-ah jersey sen an ha a, second leg-ah Republic Vengin jersey sen an ha tawh thung ang. Coach Danny chuan, "Mipui an pawimawh a, min ṭawiawmna ṭhinah kan lawm. Coaching staff leh player te chhungte chungah lawmthu kan sawi duh a, an chhungten phal taka training an phal zarah team ṭha tak kan din theih phah a ni," tiin Vanglaini a hrilh.

Semi Final
1st Leg - March 25, Thawhṭanni
Ramhlun South 0 - 1 Republic Veng
REP : Lalhriatpuia 87'
Lengpui 1 - 0 Armed Veng
LEN : Lalrokima 45'
2nd Leg - Vawiin Inkhel Tur
Armed Veng 11:00 AM Lengpui
Republic Veng 01:00 PM Ramhlun South

Note :
1. First leg leh second leg belhkhawma an la inhnehtawk a nih chuan extra time 15+15 khelh a ni ang. An la inhnehtawk a nih chuan penalty shootout hmangin chak zawk zawn tur a ni.
2. Inkhel en man hi Rs 30 a ni.
3. Community Award : NECS Cup-ah Community Award pek a ni dawn. A tehfung tur chu player au phur ṭha leh hmun hma tifai ṭha a ni. Nikum khan champion Ramhlun South chuan Community Award hi an dawng.

Kum Champion Pahnihna
2013 Ramhlun South Leitan
2014 Ramhlun South Armed Veng
2015 Armed Veng Ramhlun South
2016 Bethlehem Vengthlang Armed Veng
2017 Chhinga Veng Bawngkawn
2018 Ramhlun South Chanmari