Ronaldo a inhliam, Portugal an inhnehtawk

Thawhṭanni zan Euro Qualifier-ah champion lai Portugal chu an mual Estádio da Luz-ah Serbia nen an inhnehtawk. Mikhual team hian minute sarihna leka Dusan Tadic penalty hmangin hma an hruai a, inhliam vanga Cristiano Ronaldo chhuah hnuah Portugal hian Danilo Pereira hmangin an sut a, 1-1 in inkhel a tawp.

Group B inkhel dangah Ukraine-in Luxembourg 2-1 in an hneh a, Andriy Shevchenko enkawl team hi an match hmasa berah Portugal nen goal awm loin an inhnehtawk bawk a, group hmahruaitu an ni mek.

Ronaldo a inhliam
Cristiano Ronaldo chu malpui hliam vangin minute 31-na lekah lakchhuah a ni a, Juventus ṭantu lam tan hriat nuam a ni lo ang. Italian club hi Serie A-ah pakhatna ni mekin point 15-in an sang a, kum 34 mi Ronaldo hi pakhatna an nih theih nan hian league match 26-ah goal 19 khungin a ṭangkai hle. Hei aia langsar zawk erawh Champions League lama a chet dan a ni a, Atletico Madrid laka 2-0 a an hnufual hnuah an mualah Portugal captain hattrick hmangin an lehthal.

Juventus hian April 10 zanah Amsterdam Arena-ah Real Madrid hnehtu Ajax an hmachhawn dawn a, Ronaldo hi a dam hman dawn em tih hriat a la ni lo.

An insawifiah
Portugal coach Fernando Santos chuan, "Match hnih aṭangin point hnih chauh kan hmuh avangin kan vanglai hun chu a ni lo phawt mai. Chutihrualin kan team hian theihna, huaisenna leh beiseina kan nei a, kan khelh hmabak match rukah hian chak ngei kan tum ang. Chung zingah chuan khualmuala kan hmachhawn tur Ukraine leh Serbia pawh a tel," tiin a sawi a, an muala match hnih a zawna chak hmel an hmuh loh avangin a lawm lo.

Portugal captain Ronaldo chuan, "Ukraine nena kan inkhel ngaihtuah chuan Serbia nen chuan kan khel ṭha tawh a, goal chance pawh kan nei nghal. Mahse a goal duh tlat lo," tiin a sawi.

Serbia coach Mladen Krstajic chuan, "Ronaldo inhliam an tuar a, keini lamah pawh Gacinovic a inhliam ve tho a, a inrul tawk viau e. Kan khel ṭha a, kan inrem phui ṭha a, kan resutl hi kan phu a, kan chhuang tur a ni," tiin point hlawhchhuah an phu thu a sawi thung.