McGregor-a'n a chawlh thu a puang

UFC legend Conor McGregor chuan nimin khan khawvel barakhaihin thuchhuah a siam a, Mixed Martial Art a chawlhsan thu a puang.

Irish fighter chuan, "Mixed Martial Art tia hriat hlawh ṭhin he infiamna aṭang hian ka chawl ta. Ka thawhpuite zawng zawng an kal zelna turah duhsakna ka hlan," a ti. McGregor hian October 2018 khan Russian fighter Khabib Nurmagomedov a hmachhawn a, round linaah submission hmangin a tlawm - hemi hnuah hian a inlan leh tawh lo.

Kum 2007-a MMA-a a match hmasa ber kheltu hian a sawi ang ngeiin infiamna khawvel hi a chhuahsan a nih chuan Khabib nena an intawn kha fight a hmachhawn hnuhnung ber a ni dawn tihna a ni.

Tak tak maw?
McGregor-a'n a chawlh thu a puan rual hian, "A chawl tak tak maw?" tih chu mi tam tak rilrua zawhna lo lut a ni a, Irish fighter mizia ngaihtuahin a awm lo hran lo.

April 2016 khan McGregor hian MMA a chawlhsan thu twitter kaltlangin a lo puang tawh a, "Naupang taka chawlh hi ka duhdan a ni," tiin a lo sawi tawh - mahse a hnu rei loteah a chawl lo tih a chiang lehnghal. Tunah pawh hian McGregor chawlh hian rin hlawh loh chhan pakhat a nei - a chawlh thu a puan hma lawk hian The Tonight Show-ah Jimmy Fallon nen inkawmin Nate Diaz leh José Aldo-te nena rematch chungchang a sawi.

Mayweather chungchang pawh sawiin, "A tan ka inpeih reng a, inringtawk takin ka lo nghak reng ang," a ti a, a hnu lawkah a chawlh thu a puang leh si!

Hna a ngah!

McGregor-a'n a chawlh thu a puan hnu lawkah UFC President Dana White chuan a fighter zinga huhang ngah bera chhal ngamin chawlh a puang chu a awm loh hran loh thu a sawi.

Dana White chuan, "Chawl tawh turin pawisa a ngah tawk tawh a, a awm em em a ni. Keipawh a dinhmun angah hian ding ila, ka chawl ve tawh tho ang," a ti. UFC president chuan sawi zawmin, "Fight a chawlhsan a ni mai a, hnathawh tur tam tak a nei a, a Whiskey brand ringawt pawhin a tibuai ang. Fight hmuhnawm tak pholang ṭhin, sulhnu tam tak hnutchhiahtu a ni a, octagon chhung ang thoin hlawhtlinna a chhar ka beisei," a ti zui.

McGregor hian September 2018 khan whiskey brand a din a, MMA hi a chawlhsan tak tak a nih chuan a sumdawnna lamah hian a hun tam zawk a hman a rinawm.

Tu nge McGregor?

Kum 30 mi McGregor hian November 2016-a Eddie Alvarez a hneh khan lightweight champion dinhmun a luah a, featherweight champion lai a nih bawk avangin UFC-a weight hnih champion ni kawp hmasa ber a ni.

MMA-ah fight 25 hmachhawn tawhin vawi 21 hnehna a chang a, heng zingah hian vawi 18 chu a khingpui a knockout a, vawi li a tlawm thung. McGregor hian a vanglai taka boxing khawvel luhkhungin boxing legend Floyd Mayweather a hmachhawn a, sum a tam em avanga 'The Money Fight' an tihah hian round 10-naah technical knockout hmangin a tlawm.

Mahse, Irish fighter hi Mayweather a hmachhawn avang hian pound maktaduai 77.5 velin a hausak belh ta tho a, chawlh a puan theih chhan lian tak a tling.