Venus Williams hnehtu Halep

Simona Halep chuan world number 1 nih let ngei tumin thapui a thawh chhunzawm a, nimin zing khan Venus Williams hnehin Miami Open quarterfinal a in vaw kai.

Romanian nula Halep hian winners vawi 21 vaw chhuak chungin Venus hi 6-3, 6-3 in a hneh, American nula lakah hian a zawnin vawi li hnehna a channa chiah a ni. Quarterfinal-ah chuan 7-5, 6-4 a Yafan Wang hnehtu Qiang Wang a hmachhawn leh ang.

Seeded pathumna Halep hian Miami Open nomawi a chawi thei a nih chuan world number 1 ni thei dawn a, ani bakah hian Petra Kvitova pawhin hlawhtlinna a chang a nih chuan Australian Open champion Naomi Osaka a khum thei dawn a ni.

Czech Republic nula Kvitova hian France player Caroline Garcia chu 6-3, 6-3 in a lo hneh ve bawk a, tun season chhungin WTA hnuaia inelna hoah a vawi nga nan quarterfinal a inhlangkai bawk.

Seeded pahnihna Kvitova hian a match lehpekah chuan Ashleigh Barty a hmachhawn dawn, Barty hian Australian nula Kiki Bertens lakah set hloh hmasa mah se 4-6, 6-3, 6-2 in hnehna a chang let a ni.

Halep emaw Kvitova hian final an lut lo a nih chuan number 1 ni lai Osaka chuan a dinhmun a humhim thei dawn a, mahse anni pahnih zinga pakhat zawk pawh hian nomawi an chawi a nih chuan a dinhmun a tlakhniam a ngai ang.

Romanian nula Halep hian chawlhkar 48 chhung chu world number 1 nihna a lo hauh tawh a, tun hnai season hnih chhung phei chu a chung bera awm chungin kum tawp a hmang. Wimbledon vawi hnih champion tawh Kvitova erawh tennis a khelh hun chhungin number 1 a la ni ngai lo.