Mason-a hnuaiah Spurs an 'comeback'

Tottenham Hotspur-in Ryan Mason-a hnuaia an match hmasa berah Southampton an mikhual a, Saints-in Danny Ings hmangin goal khung hmassa mah se Spurs hian 2-1 in an lehthal.

Spurs hian hnehna an chan avangin point 53 an hmu a, paruknaah an awm. Champions League khel pha china awm Chelsea-in point 55 an hmu a, pathumnaa awm Leicester City-in point 56 chauh an hmuh bawk avangin Mason-a leh a hote tan Champions League khelh theihna kawng a la inhawng.

Chu chauh a la ni lo a, Pathianni zan dar 9:00 hian Wembley Stadium-ah Spurs hian Manchester City nen League Cup champion an zawng dawn. London club hian hnehna an chang a nih chuan Mason-a'n kum 29 mi lek ni chungin Spurs nomawi a chawipui der dawn tihna a ni.

Bul ṭantu Bale
Jose Mourinho hnuaia khelhna hmun chan harsat Gareth Bale-a'n inkhel bul a ṭan a, Harry Kane a inhliam vang a tih theih rualin manager thlak vangah a ngaih theih. Welsh forward Gareth Bale-a'n manager lailawk atana Mason an ruat a vanneihpuiah a ngaih theih.

Amaherawhchu khelmualah erawh Southampton-in bul an ṭan ṭha zawk. Saints defender Mohammed Salisu ball tauh ṭha tak chu Hugo Lloris-a'n a dang a, a per hi Che Adams-a'n hnai set sawt aṭangin volley lehnghal mah se Spurs keeper hian a dang leh hman tho.

Minute 30-naah erawh Lloris atan tih ngaihna a awm ta bik lo. James Ward-Prowse-a corner pet chu Danny Ings-a'n mawi zetin goal ban fuhin a tauh goal. Spurs-in first half-ah siphurh an sut thei lo.

Second half-ah Spurs an insiamṭha a, Lucas Moura ball pet chu Saints defender-in dang per mah se Gareth Bale-a zawnah ber kher a kal. Bale hian a bawp sei tak chuan ball chu a la ding a, thiam taka insiamremin a ke vei lam bawkin minute 60-naah a hlai goal.

Minute 75-naah Sergio Reguilon pass chu Son Heung-min-a'n chiang zetin a pet goal a, amaherawhchu defender leh keeper inkara ding Moura chu offside position-ah a awm avangin pawm a ni lo.

Hun tawpah erawh Spurs an vannei a, Moussa Djenepo-a'n mawl mang takin Harry Winks a tlawh thlu a, VAR hmanga ennawn hnuah box chhung chiah a nih avangin mualneituin penalty an hmu. Son a rawn ding chhuak a, penalty spot aṭangin minute 90-naah chakna goal a khung.

Mason a lawm
Premier League manager naupang ber Ryan Mason chuan, "Inkhelh ṭantirh minute 30 chhung kha chu Southampton an che ṭha a, khami hnua kan tho chhuah leh theih avangin ka naute chungah ka lawm hle. Halftime-ah kha chuan player-te inrintawkna pek kha a pawimawh ber lai chu a ni. Inkhel tura inbuatsaih turin hun nghah lo a, chutihrualin ka ngaih pawimawh erawh inpekna, tha hrui leh huaisenna a ni a, heng zawng zawng hi ka naute aṭangin ka hmu a ni," tiin a sawi.

Spurs-in league match hnuhnung pathumah chak hmel an hmu lo a, Mason-a hnuaia hnehna an chan nghal avangin an phur thar khawp ang. London club hian Manchester City nen League Cup final an khelh zawhah relegate tawh Sheffield United an tum dawn. Blades zawh hian Leeds United, Wolves, Aston Villa leh Leicester City te an la hmachhawn dawn a, Champions League khelh tum zinga fixtures nei ṭha ber zinga mi a nih avangin hmabak an nei êng hle.

Tu nge Mason?
London tlangval Ryan Mason hi Premier League thlir ṭhin tan chuan mi thar a ni tawh lo. Chutihrualin a footballl career rei lo tak avangin hriat fuh loh palh a awm thei bawk. Ryan Glen Mason hi June 13, 1991 khan Enfield, London-ah a piang a, infiamna lam ti thei tak niin district hurdles champion ni thei a ni. Kum riat mi lek a nihin Tottenham Hotspur academy a zawm, kum 2008 khan kum 17 mi lek niin professional contract a ziak. Spurs-ah khehna hmun chan a harsat avangin club hrang hrang Yeovil Town, Doncaster Rovers, Millwall, Lorient leh Swindon Town-ah te loan in a chhuak kual.

English midfielder Mason hian 2014–15 season-ah Spurs tan hmun pawimawh a chang a, league-ah ringawt pawh match 31 a khel. Amaherawhchu, Mason-a'n hmun nghet chan a harsat avangin Hull City a pan a, January 22, 2017 khan Chelsea nen an inkhelh ṭumin Gary Cahill nen an intauh a, a luah hliam a tuar. A luruh khik vang hian zai a ni a, a lu ruh zawm khawm nan hian metal plate 14 leh screw 28 an hmang a, hmun 45-ah an chilh bawk.

Mason-a tan inkhelh zui ngam a ni tawh lo a, February 13, 2018 khan inkhelh a chawlhsan. April 2018-ah Tottenham coaching staff a zawm a, Spurs Under 19 team-te enkawlin kum 17-23 player-te tan head of player development te a thawk leh bawk. April 19, 2021-a Jose Mourinho ban a nih khan manager lailawk atan ruat a ni a, Spurs enkawl hna a thawh ṭan hian kum 29 leh ni 312 mi lek a ni.