Zan curfew karah Goa inkhel dawn

Covid-19 vangin khawvel a talbuai chhunzawm zel a, AFC Champions League Group E inelna bik thlengtu Goa state pawhin zan lam pawn chhuah khapna thupek an tichhuak thar a, hetichung hian Champions League erawh kalpui chhunzawm tur a ni ang.

Goa hian Nilaini ringawt khan Covid-19 kai thar mi 1,000 chuang an hmu chhuak a, nizan thleng khan Goa-ah hian Covid-19 kai inenkawl mek hi mi 9,300 an tling tawh a, mi 900 chuangin an nunna an chan tawh bawk.

Hetiang boruak karah hian Goa chief minister Pramod Sawant chuan zan lam curfew hi hri darh chak lutuk tur inven nan a puang a, zan dar 10:00 aṭanga zing dar 6:00 thleng chu pawnchhuah khap tlat a ni.

Football fan-te rilruah AFC Champions League-a lo lang nghal a, khelh chhunzawm theih loh mai hlauhthawnna a lian hman hle. Mahse, Goa sports minister Manohar Ajgaonkar chuan, "Champions League chu ruahman sa angin engkim kaltlangpui a ni ang," tiin sorkarin phalna an pek thu a sawi.

FC Goa chuan zanin dar 10:30-ah Persepolis an hmachhawn ngha dawn a, Iranian champion hi Thawhlehni zan khan Goan club hian 2-1 in an lo ngam lo tawh - phuba lak an tum ang.

Goan club hian an match hmasa pahnihah Al-Rayyan leh Al-Wahda chu 0-0 ve vein an inhnehtawkpui a, mahse, Persepolis lakah goal hmahruai khung chunga 2-1 a an tlawm avangin group table-ah pathumna an ni mek.

Season hmasa Champions League finalist Persepolis hian Iranian player hlangin an khel ṭhin a, chutihrual chuan group E-ah anni aia ṭha zawk an awm lo - Goa laka bul ṭan 11 zinga pakua zet kha Iran tana khel tawh an ni a, an inmanin an ṭha tlang hle.

Hei vang tak hian mahni inrintawkna nei turin Goan club tan hnehna chan a ṭul a, Persepolis hi an hneh thei a nih ngat chuan beiseina sang zawk nen Al-Rayyan leh Al-Wahda an la hmachhawn thei ang.

Chutihrual chuan Goan club tan Brandon Fernandes, Dheeraj Singh leh captain Edu Bedia chet ṭhat leh a pawimawh dawn tihna a ni a, zaninah 'upset' thlentir an tum dawn.