Cadiz ngamtu Real-in beisei an nei thar

Getafe laka an chak zawh loh hnuin Real Madrid chuan league nomawi chawi an la tum ve reng tih thiltih hmangin an lantir a, Ningani zan khan an mikhualna ramah Cadiz chu 3-0 in an sawp - season tharah Champions League an khel dawn tih a chiang ta bawk.

Real Madrid tan an thiampuipa Karim Benzema chuan goal hnih a khung a, Alvaro Odriozola chuan goal khat khung ve bawkin Cadiz lamin a chhanletna tur an nei lo.

Sevilla pawhin La Liga nomawi an la beisei ve reng tih thiltih hmangin an lantir a, an mikhualna ramah Levante chu 1-0 in an hneh - Youssef En-Nesyri chuan inkhela goal awmchhun hi a khung a, pathumnaah Sevilla-a hlangkai.

Real pawhin hnehna an chan avangin table chung berah an awm zui a, hetihrual hian he thuziak i chhiar meuh chuan Real leh Sevilla hi table-a an dinhmun a danglam leh tawh mai thei - nizan khan Atletico leh Barcelona an inlan a, he thu buatsaih a nih lai hian result kan hre hman lo.

A hming Benzema
Real-in an league match hnuhnung berah Champions League khelh chauh avangin Benzema chu bench-ah an dah a, a chhanna chu Getafe nen 0-0 a inhnehtawk a ni - French striker hi bench aṭangin luhtir leh ni bawk mah se danglamna a thlen thei tawh lo.

Cadiz lakah erawh Zinedine Zidane-a'n thutlukna siam sual nawn a duh lo a, a ralthuam neih ṭha ber, tia chhal ngam French striker hi bul a ṭantir nghal - a tisual lo chiang hle.

Minute 30-naah Benzema hian goal-a khung ṭan a, he goal hi penalty aṭanga a khung a ni thung. Cadiz player Isaac Carcelen chu Vinicius Junior lakah a foul a, video assistant referee hmanga ennawn a nih hnuah Real hi penalty pek an ni.

Cristiano Ronaldo chhuah hnua Real goal khung khawl Benzema chuan penalty hi harsatna nei loin goal-ah a chantir a, minute thum hnu lawkah Odriozola khung tur chu duhthusama ṭhain a siamsak zui.

A la tawk lo
Benzema-a'n goal khat khungin assist vawi khat a nei a, minute thum chhunga thleng vek a ni - mahse, kum 33 mi striker hian duhtawk mai a la tum lo. A goal khung aṭangin minute 10-a liam a, Casemiro siamsak chu an goal thumna ni turin a tauh lut.

Real Madrid history-a dai tawh ngai lo tur Benzema hian tun season-ah league match 28 khelin goal 21-a khung tling ta der a, inelna hrang hrangah match 38 khela goal 27 khungin assist vawi sarih a nei bawk.

Cadiz lakah Benzema leh Real an vul a, hetihlai hian inkhelh zawha sawi hlawh erawh European Super League tho a ni - Cadiz khemual Nuevo Estadio Ramon de Carranza pawnah fans sang tel an pungkhawm a, ESL duh lohna an lantir.

Real president Florentino Perez chu ESL-a thlen theih nana sulsutu zinga mi a ni a, club tam zawk an inhnuhdawh tawh avangin he league hi a thleng leh thei dawn lo tih chiang mah se he thu buatsaih a nih thleng hian ESL aṭanga Real inhnuhdawh thu hriat a la ni lo.

Sawi bo theih loh
Real Madrid-in Cadiz an sawp hma inkhelah Sevilla chuan 1-0 in Levante an hneh a, Sevilla hi an elpui club Atletico Madrid, Real leh Barcelona-te angin lian lo mah se sawi bo theih an ni ta tlat lo - Real nen an inkarah point thum chauh a awm tlat!

Sevilla tan Youssef En-Nesyri chuan minute 53-naah he inkhela goal awmchhun hi a khung a, Liverpool rawlthar beiseiawm ni ṭhin Suso chuan Moroccan forward goal khung tur hi a siamsak a, En-Nesyri hian Levante keeper Dani Cardenas-a tlan hel hnuin goal ruakah a khung.

Kum 23 mi En-Nesyri hian European club liante chil a tih put chhunzawm zel a, tun season inelna hrang hrangah match 46 khelin goal 23 ngawt a khung tling ta - La Liga bikah goal 17-a khung tawh.

Sevilla hian May 9-ah Real Madrid chu an la lenchilh dawn a, Real boss hlui Julen Lopetegui enkawlna hnuaiah he team hian an elpui team an la tum dawn miau avangin nomawi beiseina a sang viau ang - May 8 zanah Barcelona leh Atletico Madrid-te an la intum dawn tih hriat tel a ṭha. A tawi zawnga sawi chuan La Liga-ah eng pawh la thleng thei a ni.

Kartawp inkhel
Nizan khan Atletico Madrid leh Barcelona-ten league match an khel a, he thu buatsaih a nih lai hian an result kan hre hman lo - kartawpah inkhel a awm zui dawn bawk a, La Liga club-te an inlan kim vek ang.

Real Madrid chuan zanin dar 12:30-ah team tawh khirh Real Betis an mikhual dawn a, Pathianni zanah an elpui club Barcelona, Atletico leh Sevilla an inlan ve dawn chauh thung. Barcelona hian Pathianni zan dar 7:45-ah Villarreal an lenchilh dawn a, table-a parukna ni mek Yellow Submarine (Villarreal sawina) hian season tharah Europa League khelh an beisei avangin a awlsam lo ang.

Pathianni zan dar 10:00-ah Sevilla-in beisei tur hranpa em em nei lo Granada an mikhual dawn a, Atletico-in zan dar 12:30-ah Athletic Bilbao an lenchilh dawn thung - La Liga-ah thil thleng thei a la tam a, a ngaihnawm dawn chauh.