ESL a tawp lo, a chawl rih - Perez

Real Madrid president Floren-tino Perez chuan European Super League (ESL) dintu club 12 aṭangin pakua an inhnukdawk chungin a la tawp lo a, a chawlh rih ringawt thu a sawi.

Pathianni khan ESL awm tur thu hi puan a ni a, duh lotu ṭhahnem tak an awm avangin Thawhlehni zanah Premier League club parukte an inhnukdawk vek. Atletico Madrid, Inter Milan leh AC Milan te an inhnuhdawh zui avangin ESL hi kalpui zui theih a ni tawh lo a, chutichung chuan a hnarkaitu ber Perez a la ṭang kawh hle.

ESL chairman Perez chuan, "Hma kan la chhunzawm zel. Contract-in min phuar a, hming kan ziah hnan vek avangin awlsam taka chhuah ngawt a theih loh. Club 12 hi an la tel vek," tiin a sawi a, amaherawhchu Real Madrid president hian dan lo anga ESL chhuahsante hremna tur chungchang zawhna a chhang duh lo.

UEFA leh FIFA bakah football supporter-ten nasa takin ESL hi an dodal a, hemi avang hian tlawlhah a ngaih theih. Kum 74 mi Perez chuan, "Kan sawifiah chiang lo a ni thei a, chutihrualin sawifiahina hun min pe lo bawk.

"Football-ah hian kum 20 chhung ka inhmang tawh a, hetiang renga invauna nasat ṭum hi ka la tawng lo. Mi kan that ta emaw tih tur ang maiin min vau a, football kan ti hlumah an ngai. A nihna tak erawh football chhanchhuah kan tum vang zawk a ni," tiin a sawifiah.

Kum 2024 aṭanga Champions League kalphung thar tur leh tuna kalpui mek dan sawiin Perez chuan, "Champions League kalphung hi a hlui tawh a, quarterfinal aṭang chauhin ngaihven a hlawh ṭan.

"Tuna kalphung a fuh loh vang tak hian kalphung thar kan duang a, a tir aṭangin team ṭha intum se kan duh a ni. English club paruk zingah khan pakhat rilru hmin zan lo a awm. Khami khan hlauhthawnna a ngah a, thil kalphung a hre fuh lo bawk a, kan buai phah ta a ni," tiin a sawi a, club hming erawh a sawi lang duh lo.