Conte-a Inter tan nomawi a hnai ta

Antonio Conte enkawl Inter Milan chuan Serie A nomawi an sual chhuak ngei dawn niin a lang ta. Inter hi an khingpui Spezia nen 1-1 in an inhnehtawk a, point hnih hloh mah se anmahni hnaih bertu AC Milan an chak loh avangin Inter dinhmun a ṭha chhunzawm.

Nilaini zan inkhel dangah Juventus chuan goal an phurh hmasak hnuin Parma 3-1 in an lehthal a, champion lai hian point thum hlawh chhuak mah se hmahruaitu an phak lohna chu point 11 zet a ni - league match khelh hmabak paruk chauh an nei tawh.

Champion zia
Serie A hi team tiin match 36 an khel ṭhin, champion tur chuan kaltluan a ngai hle. Chak reng theih a ni bik lo a, khelh fuh tawk loh nia point hmuh hram leh elpui lam an lo chetsual ve a pawimawh ṭhin - heng zawng zawng hi Inter tan a ni mek.

Spezia mualah Inter Milan tlarhma an hriam tawk lo, minute 12-na lekah mualneitu lamin Diego Farias hmangin goal hmahruai an khung; chawlhlawk hmain Inter tan winger Perisic chuan a sut a, 1-1 in chawlhlawk an hmang.

Second half-ah Inter hian ball chang tamin hun ṭha insiam hnem mah se an vannei thei tawh lo. Lautaro Martinez, Achraf Hakimi leh striker palian Romelu Lukaku ten an hun ṭha neih an khawhral vek a, mahse an tlarhnung an phui miau avangin point an hmu.

Inter-in point an hloh avangin AC Milan hi chak ni se an inkar a zim sawt dawn. Mahse, Milan hi an mikhual Sassuolo lakah 2-1 in an tlawm a, an hmelma leh elpui ni bawk Inter tan 'scudetto' lak theihna kawng an hawn zausak ta zawk.

ESL bawk
Inter Milan, AC Milan leh Juvetus hi European Super League khelh tum zinga mi kha an ni a, mahse Italian club ṭha ho hian ESL hi an khel dawn leh lo. Italian club dangte chuan Serie A club lian pathum chet dan hi an dem hle.

Sassuolo coach Roberto de Zerbi chuan Milan hmachhawn tura zin chhuah loh a duh hman hial, mahse inkhel erawh an ṭhulh ta lo. Milan legend leh club director ni bawk Paolo Maldini chuan ESL avang hian ngaihdam a dil.

Italian legend Maldini chuan, "Milan tan chauh ni lo, football fans zawng zawng tan ESL avang hian ngaidham ka dil. Football hi hun rei tak chhung kan lo inrochun tawh leh awmzel tur a ni a, keini chuan football hmangaihtute hi kan zah," a ti.

Serie A club bakah hian Premier League club ṭha paruk leh, Spanish la Liga aṭangin Atletico Madrid an inhnukdawk tawh a, thawm ring tak nei hluai mah se European Super League chu an tum angin a kal thei dawn ta lo.

Juve an chak
Hliam damkawr Cristiano Ronaldo chu khelmual chhungah a inlan leh thei tawh a, Portuguese forward hian goal khung nghal lo mah se team tan a ṭangkai. Old Lady hian Alex Sandro goal hnih leh Matthijs de Ligt goal hmangin an mikhual Parma 3-1 in an hneh.

Turin club hi tun hnaiah a zawnin season kua ngawt Italian champion an ni thei, kuminah erawh ui tak chungin an nomawi an hloh dawn - Andrea Pirlo naute hi pathumnaah an awm lailawk a, nizan khan Atalanta inlanin an chak a nih chuan Juve hi palinaah an tlahniam leh ang.

Juve manager Pirlo chuan, "A tirah goal chhuah hmasa zuk mah ila kan rilru put hmang a dik miau chuan kan tho chhuak leh ṭhin. Tlarhma lamah Paulo Dybala khan goal khung lo mah se remchang a siam hnem a, hmuh hmaih theih a ni lo.

"Kan goal vengtu Gigi Buffon nen khan kum 16 mi chauh kan nih lai aṭangin kan inhre tawh, tunah pawh ṭha takin a la khel thei reng. Ani hi chu player danglam leh ṭha bik a ni a, player naupang zawk tan zir tur tam tak a hnutchhiah," a ti.