VAR chelh din zawh loh Liverpool - City an chak

Inrinni zan Premier League inkhelah Liverpool chuan 2-1 in West Ham an hneh a, team pahnih hi 1-1 in inhnehtawk reng mah se minute 85-naa Diogo Jota goal hmangin Liverpool an chak. 

Hammers-in Anfield-ah Pablo Fornals hmangin minute 10-naah goal hmahruai an khung a, mahse Liverpool hian Mohamed Salah penalty leh Jota hmangin an chhanglet a ni. 

Liverpool tan bench aṭanga luhtir Jota hi a goal hmasa zawk chu VAR hman a nih hnuah pawmsak a ni lo a, a goal hnihnaah erawh sawisel tur a awm lo. 

Reds inkhelh hmain Manchester City-in hnehna an chang bawk a, Sheffield United chu Kyle Walker-a goal khung hmangin 1-0 in an hneh - Premier League-a an match hnuhnung pangaa an vawi hnih chak vena chiah a ni. 

Hliamin Liverpool-a tlak buak a, defender rinrawl Virgil van Dijk-a inhliam hnuah a thachhang dawltu Joel Matip leh centre back-a chhawr Fabinho-te an inhliam a, Jurgen Klopp-a'n Premier League match la khel lo Nathaniel Phillips chungah rinna a nghah a ṭul. 

Kum 23 mi Phillips hi tlarhnung laiah Joe Gomez nen an ding dun a, chesual hmasa zawk erawh tawnhriat nei ṭha Gomez a ni - English defender hian Arthur Masuaku-a cross aṭanga ball kal chu Fornals ke zawnah tak a tauh thla a, Spanish midfielder hian goal kil sirah a khung. 

June thlaa Liverpool-in Premier League nomawi an chawi tih a chian hnua league match 14-a goal 27 an chhuahna chiah a ni a, hei hi VVD inhliam hma aṭang tawha an buaina a nih avangin Klopp-a'n a chinfelna tur a ngaihtuah ran a ṭul ang. 

German coach hian lawmna tur erawh a nei - Phillips a khel ṭha a, season hmasaa VfB Stuttgart (loan) tana German second division inelna hmachhawntu hi a bik takin ball kangah a ṭha hle. 

Liverpool-in goal an chhuah hnuah nawr na mahse an beisei angin an khung lawk thei lo a, si phurh sut turin minute 42-naa Salah penalty an nghah thlen a ṭul. 

Hammers defender Masuaku chuan ṭul lo takah Salah ke a pet fuh a, Egyptian forward hi penalty hlawhchhuah ngei tumin uar takin a tlu - referee-in penalty spot a kawk a, Salah-a'n si phurh sut nan a hmang zui. 

West Ham-in Wolves leh Leicester City an sawp hnuah Tottenham Hotspur leh Manchester City an inhnehtawkpui thei a, goal an chhuah hnuah huaisen takin Reds an nawr ngam. 

Mahse, players inhliam ngah chunga squad chhah zawk ṭhatna a lang a, Klopp-a'n minute 70-naah khel ṭha lo Curtis Jones leh Roberto Firmino la chhuakin West Ham-ah khel se first XI chang chiang tur Xherdan Shaqiri leh Jota a luhtir. 

Jota-a'n khelmualah hun reilote chauh a hmang hman tihin goal a khung nghal a, mahse goal luhna kawngah Sadio Mane-a lo foul avangin VAR hmanga pawmsak a ni lo. 

Minute 85-naah erawh VAR-in Jota a dang nawn lo - Shaqiri chuan nipui transfer-a Klopp-a'n a hralh loh chhan pholangin Jota tan mawi zetin a siamsak a, Portuguese forward hian Anfield-a a match hmasa pathuma a goal thumna ni turin a khung. 

Jurgen Klopp chuan, "Ka beisei aiin a ṭha daih zawk a, chu chuan minti lawm hle. Talent nei ṭha tak player a ni - a tlan thei a, a chak a, a thiam a, a ke pahnihin a pet thei bawk," tiin September-a pound maktaduai 41-a a lei player chu a fak. 

Liverpool-in hnehna an chan leh takin avangin Anfield-a an league match hnuhnung 63-ah tlawm an nei lo a, Reds coach ropui Bob Paisley hoa 1978-1981inkara record lo awm tawh chu an nih rual. 

Manchester City-in tun season-a team talbuai tak Sheffield United chu 1-0 in an hneh a, City tana league match 100-a khelhnaah Kyle Walker chuan amah chher liantu club lamah ṭha zetin a khung.

Walker hian a inzirchhuahna club lama a goal khung hi a lawm duh lo a, Sheffield-a piang defender chuan, "Sheffield-ah hian ka nu leh pa an cheng a, ka goal khung kha lawm i la chu, min vaw hrep mai ang! Sheffield United fan ka ni a, ka lawm thei lo a ni," a ti. 

Pep Guardiola enkawl City hian tun season-ah beisei an phak lo hle - Sheffield an hneh hi league match ruk an khelh tawha an vawi thum chakna chauh a ni a, vawi hnih an tlawm a, vawi khat an  khingpui an inhnehtawkpui.

City hian Thawhlehni zan dar 1:30-ah Champions League group stage khel turin Olympiakos an mikhual dawn a, Pep-a naute inkhelh hunah hian hampions League group stage match-ah vek Liverpool-in Atalanta an lenchilh dawn bawk - Premier League club lian pahnih hi November 8-ah an intawng zui ang. 

Beisei anga season hmang lo City tan lawmna tur a awm a, ṭum dang ang thoin tlarhma lamin season hmasaa an theihna ang pholang thei lo mah se an buai fona tlarhnung lamin hma an sawn. 

Kum 30 mi Walker hi Pep-a rinrawl a ni a, English right back chiah hi Spanish manager-in tun season-a a khelhna a la siksawi loh awmchhun a ni a, an match zawng zawngah inkhel bul a ṭan vek bawk. 

West Ham nen 1-1 a an inhnehtawk hnuah City hian Champions League-ah Marseille chu 3-0 in an sawp a, tun season-a a vawi khat nan match zawnin City hian goal an chhuah lo. 

Full back-ah Walker leh Joao Cancelo an hmuhnawm a, tlarhnung laiah Aymeric Laporte leh Ruben Dias an inman chho ṭan tih a lang bawk - Pep-a tana pawimawh ber erawh Liverpool an mikhual hmaa an tlarhmate 'magic' neih let leh a 

ni ang.