Number 1 Novak Djokovic a tla

Mipa tennis world number 1 Novak Djokovic chu Roberto Bautista Agut hneh loin Miami Open fourth round aṭanga vuak tlak a ni a, vawi ruk a champion tawhna hmunah quarterfinal lut zo loin a zinkawng a tawp.

Nimin zing inkhelah Djokovic hi 1-6, 7-5, 6-3 in a chak lo, Spanish player Agut hi January thla khan Qatar Open-ah a ngam lo tawh bawk a, a zawnin a hneh lo tihna a ni.

Inkhel hmuhnawm
Match 41 a chak zawn tawhna hmunah Djokovic hi hnehna chang tura rinkai a ni. Set khatna hi minute 31 chhung lekin nuamsa takin a la a, set hnihnaah 5-4 in hma a hruai hman bawk - hnehna chang turin a dinhmun a ṭha hman hle.

Amaherawhchu, ruah sur vangin inkhel chawlh lailawk a ni a, inkhel an ṭan leh hnuah Agut a rawn ding khawng hle. Agut hian Djokovic-a'n break point vawi sarih a hmuh zinga ṭum ruk chu a inchhanhim thei a, a service hmasa aṭangin 80% zet point a hmu bawk.

Deciding set khelh a ni - seeded 22-na Agut hian 4-2 a hma hruai nghalin a dinhmun a siamṭha a, match point a hmuh hmasak berah a tlang nghal. Djokovic hian Miami Open bikah set hmasa a lak hnua a chak loh lehna hmasa ber a ni.

Insiamṭhat a ngai
Kum 31 mi Djokovic hi a tournament khelh hnuhnung zawk Indian Wells-ah third round a paltlang zo lo bawk a, Australian Open nomawi a chawi hnuah beisei ang result a la nei thei lo; tunah chuan clay court season hmang turin inbuatsaihna a neih chhunzawm a ṭul dawn.

Grand Slam vawi 15 champion tawh Djokovic chuan, "Pawn lamah thil ngaihtuah ka ngah a, inkhelh ni loah rilru ka hman hnem avangin chu chuan court chhungah nghawng ṭha lo a nei ta niin ka hria. Mahse, hringnunah chuan buai leh harsatna tawh chang hi chu a awm ve thei a ni.

"Agut kha a rilru puthmang a dik a, a huaisenin tharum pawh a ngah. Mahse, keima hi ka inenfiah a ngai, set hmasa ber awlsam taka lak hnua chak loh hi chu a dik lo, hun ṭha tam tak ka hloh kha ka ennawn anga, siamṭhat ngai lai ka siamṭha ang," tiin a sawi.

Australian Open, Wimbledon leh US Open nomawi kawl mektu Djokovic hian French Open champion nih leh a tum dawn a, Paris-ah hlawhtlinna a chang thei a nih chuan tennis a khelh hunchhunga a vawi hnih nan ṭum khatah Grand Slam nomawi pali a kawl kim thei ang.

Djokovic chuan, "Naupan lai chuan clay-ah kan inkhel ṭhin, inkhelh nuam ka tihna leh thiamna hmun a ni. Tun hnai tournament pahnih ai hian clay court-ah ka khelh ṭhat ngei ka beisei," tiin hma hun a thlir.

Inkhel dang
Miami Open last 16 inkhel dangah Kyle Edmund chu John Isner lakah 7-6 (7-5), 7-6 (7-3) in a chak lo. Britain number 1 Edmund chuan khawtual tlangval nena inkhelh a harsat thu sawiin, "Point a hmuh apiang khan an au dur dur zel a, inkhel boruak a siam danglam thei a ni," tiin a sawi.

American tlangval Isner hian Edmund lakah hian a service neih ṭhat a chhawr ṭangkai leh hle a, set hnih an khelh chhung hian vawi 18 ngawt aces vaw chhuakin, double fault vawi khat chiah a nei - Djokovic hnehtu Agut nen semifinal luh inchuhin an inkhel zui leh ang.

Inkhel dangah kum 18 mi Felix Auger-Aliassime chuan a khelh ṭhat chhawm nung zelin Nikoloz Basilashvili 7-6 (7-4), 6-4 in a hneh. Qualifying aṭanga in vaw kai Auger-Aliassime hi kar leha ATP rankimng chhuak tharah chuan a sang 50 zingah a tel phak dawn a, 2000 hnulama piang chinah hetiang dinhmun luah thei hmasa ber a ni dawn.

Player chanchin ngah ve tak Nick Kyrgios chu Borna Coric lakah 4-6, 6-3, 6-2 in a chak lo. Croatian tlangval hian a match lehpekah chuan Auger-Aliassime a hmachhawn leh dawn a ni.

Australian tlangval Kyrgios hi inkhel entu fans nen an inchhaih buai vangin point paih sak a ni a, a chet fuh theih loh vangin racquet a vaw chhe bawk. Kyrgios chuan, "Darkar hnih leh minute 20 chhung hah takin ka inkhel a, ṭawngkam mawi lo kan dawng a nih chuan insum a har ṭhin," tiin a insawifiah.