Samuel-a'n Minerva a pan

Shillong Lajong captain Samuel Lalmuanpuia chuan Minerva Punjab a pan a, June thleng Punjab club tana khel tur hian inremna an nei.

Chandigarh Football Academy aṭanga inzir chhuak Samuel-a hian kum 2016 aṭang khan Lajong senior team tan hian a khel ṭan a, season hnih liam taah khan Lajong tan captain a ni.

Meghalaya club-ah hian a hming a chher viau a, I-League 2017-18 season-ah phei kha chuan Emerging Player of the League-ah thlan a lo ni hial tawh.

Mohun Bagan coach hlui Shankarlal Chakraborty-a'n, "India rama set piece pet thiam ber," tia a lo sawi tawh Samuel-a hian Lajong-ah a contract a hmang zo tawh a, Minerva-a a contract zawh hunah a duh lam a pan thei ang.

Samuel-a chuan, "AFC Cup khelh ka chak a, ka hun ṭha neih hi bawhpelh ka phal lo a ni," tiin Punjab club a pan chhan Vanglaini a hrilh.