Palina chinah kan awm ang - Emery

International match an khel zo a, tunkar tawp aṭangin Premier League khelh chhunzawm a ni leh tawh dawn. Arsenal manager Unai Emery chuan a sang pali zingah an tel phak ngei a rin thu a sawi.

Gunners hian an player ṭha ṭhenkhat chu ram tan feh chhuahtir mah se Dubai-ah training neiin an kal a, he hunah hian UAE club upa ber Al-Nasr SC nen friendly match khelin 3-2 in hnehna an chang.

League chungchang sawiin Arsenal manager Emery chuan, "A harsa dawn tih chu kan hria a, mahse match tinah hian hmasawnna kan nei ve zel. Kan match lehpek chu April 1 zanah Newcastle nen a ni dawn, a sang pali zinga awm tur chuan hnehna chan a pawimawh ang," a ti.

EPL hmahruaitu Liverpool-in point 76 an nei tawh a, Reds aia match khata khel tlem zawk Manchester City (74points) chuan dawtin an hnuaiah Tottenham Hotspur (61points) an la awm bawk - Gunners leh Spurs inkarah point khat chiah a awm.

Spanish manager Emery chuan, "Club ṭha paruk zinga mi hmachhawn tur kan nei tawh lo a, club dang erawh an la inhmachhawn kual deuh vek dawn. Kan tan kawng a inhawng zau a, mahse season tawp lamah chuan club zawng zawng hmachhawn an harsa vek," tiin a ṭawng fimkhur hle.