Italy-in goal an sur tir

Euro 2020 qualifier-ah Italy-in hnehna chang turin harsatna an tawk lo a, Thawhlehni zan khan an mikhual Liechtenstein chu 6-0 ngawtin an sawp.

Italy tan hian Fabio Quagliarella chuan goal hnih a khung a, Stefano Sensi, Marco Verratti, Moise Kean leh Leonardo Pavoletti te chuan goal khat ṭheuh an khung bawk. Azzurri hian Euro 2020 qualifier-ah match hnih khel tawhin hnehna an chang ve ve a, Liechtenstein an hmachhawn hma hian Finland chu 2-0 in an lo hneh tawh.

World ranking-a 181-na Liechtenstein erawh mangchhiain a la ṭinsan thei rih lo a, an match hnuhnung 32-ah vawi hnih chiah hnehna an la chang.

Fabio a la tar lo
Italy hian minute 32 chhungin Stefano Sensi leh Marco Verratti hmangin goal hnih an khung phawt a, kum 36 mi Fabio Quagliarella chuan penalty hmangin goal hnih a khung ve zui bawk.

Quagliarella hian Italy tana penalty hmasa zawk a pet goal chiah hian an ram tana goal khung thei upa ber dinhmun a chelh nghal a, kum 36 leh ni 54 mi a ni.

Juventus striker hlui hian ni 35 leh ni 62 mi ni chunga Italy tana goal khung tawh Christian Panucci record a rawn khum nghal a, a record hi a ropui hle.

Sampdoria striker Quagliarella hian uaiin ṭha mi ang maiin a zia a lantir a, a upa tulh tulh a, a ṭha tulh tulh - tun season-ah Sampdoria tan match 29-ah goal 21 a khung tawh a, season hmasa khan goal 19 a lo khung tawh bawk.

Rawlthar duhawm Kean
Fabio Quagliarella-a'n Italy tana goal khung thei upa ber record a siam zanah kum 19 mi Kean chuan goal a khung ve bawk a, Juventus striker hi kar hmasa lawka Finland laka goal khungtu kha a ni.

Kean hian ram tana inkhel bul a ṭan hmasak pahnihah goal a khung ve ve tihna a ni a, Finland laka goal a khung khan Italy tana kum 60 hnua goal khung thei naupang ber dinhmun a luah. Italy tana goal khung thei upa ber dinhmun luahtu Quagliarella hian kum 2007 khan ram tan a match hmasa ber a khel a, hetihlai hian Kean hi kum sarih mi chauh a la ni!

Kean hian Juventus-ah hmun pawimawh la chang phak lo mah se Italy tan a hun ṭha neihah a theihna a pholan ṭhin miau avangin en kan luih a harsa a, Italian club-ah hmun pawimawh a chan chhunzawm a nih pawhin a mak lo ang.