NECS Cup semifinal-ah football hmuhnawm a kim

Republic Veng an tlo
Republic Veng chuan NECS Cup champion lai leh record nei ṭha ber Ramhlun South hnehin final an lut. Tun hmaa football thiam veng tiha sawi ṭhin Republic Vengin football khelh an la thiam reng a, final lut turin Ramhlun South hi aggregate-ah 3-2 in an hneh a, second leg bikah 2-2 in in an inhnehtawk.

Final hi March 29, Zirtawpni tlai dar 2:00-ah khelh a ni dawn a, NECS Cup final vawi khat luhna Republic Veng hian 2015 champion Armed Veng an hmachhawn ang.

Ramhlun South an inpeih
Semifinal hmasa zawkah Armed Vengin Lengpui an lehthal a, Ramhlun South tan fuihtu ṭha tak a ni. Coach Danny Lalduhawma chuan, "Lehthal turin game plan kan siam a, final thlen ngei kan tum," tiin inkhelh hmain Vanglaini a hrilh.

Ramhlun South starting eleven-ah Malsawmfela hmuh tur a awm lo a, a nau Vanlalthlamuana'n bul a rawn ṭan thung. NECS Cup vawi thum champion tawh hian chak tumin bul an ṭan a, an goal nawr a nat avangin Republic Veng tlarhnung a nghing nghal.

Minute 31-naah Lalnunmawia freekick chu box chhungah an khawih per avangin Republic Veng keeper RS Lallawmzuala'n a dang ṭha tawk lo a, Thlamuana'n goal-ah a chantir a, Ramhlun South chu chak tura rinkai zawk an ni ta thung.

Hei le, Republic Veng
Republic Veng coach PC Lalnunsiama'n halftime a hmangṭha a, substitution awmze nei siamin tlarhnung tichak turin captain K. Lalnunzama (Valtea) chu pawt lein rawlthar ball thiam Lalnunzira a luhtir thung.
First leg-a goal awmchhun khungtu Lalhriatpuia chuan minute 53-naah ṭha zetin Republic Veng tan a tauh lut a, midfield-ah Paul Ramfangzauva ṭangkai bawkin inkhel an thunun ta zawk.

Republic Venga hming langsar ber erawh F. Lalrinpuia a ni a, minute 82-naah Valpuia hian Vanlalnghenga cross ball duhthusam chu a khung. Hemi hnu hian Valpuia hi box chhungah tlu mah se penalty pek a ni lo a, Hriata'n keeper chiah a hmachhawn hnuah a ti goal lo.

Goal mamawh zawk Ramhlun South tlarhnung a pherh a, bench aṭanga rawn lut Malsawmfela a che hlei thei lo. Republic Vengin an nawr luat an tuar a, injury time-a Lalremruata goal zarah Ramhlun South-in beiseina thar an nei a, an khung tlai hret avangin goal dang khungna hun a awm tawh lo.

Republic Veng coach PC Lalnunsiama chuan, "Player-te thawhrim rah a ni a, kan inlungrual zar kan zo a ni. Republic Veng mipui kan ṭangrual a, Local Council leh RGSA-in team hi enkawl mah se NGO dang zawng zawngin min thlawp ṭha vek. Football hian kan vengah inpumkhatna a thlen a, kan lawm takzet a ni," tiin CYMA Football 2008 final-a an hneh loh Ramhlun South laka phuba an la thei chu lawmawm a tih thu a sawi.

1st Leg - March 25, Thawhṭanni
Ramhlun South 0 - 1 Republic Veng
REP : Lalhriatpuia 87'

2nd Leg - March 27, Nilaini
Republic Veng 2 - 2 Ramhlun South
REP : Lalhriatpuia 53'; F. Lalrinpuia 82'
RHS : Vanlalthlamuana 31'; Lalremruata 90'
Aggregate-ah Republic Veng 3-2 in an chak