Armed Vengin Lengpui an lehthal

Armed Veng coach Lalbiaksanga Colney-in Lengpui kan lehthal thei ang tih a sawi chu a takin a thleng a, nimin semifinal second leg hmuhnawm takah hnehna changin final an lut. Inkhelh banah erawh BS-a Colney chuan, "Kan vannei a ni e," tiin tawi fel thlap leh chiang takin inkhel chungchang a sawi.

Lammual inkhel hmuhnawm takah hian first leg-a hnehna changtu Lengpui an che

ṭha hmasa a, minute sarihna lekah Lalrokima hmangin hma an hruai a, aggregate-ah 2-0 a nih chiah. Amaherawhchu, Armed Vengin second half-ah Lalbiakhlua penalty leh Lalfakzuala freekick hmangin an chhanglet a, aggregate-ah 2-2 a ni chiah.

Extra time second half-ah Armed Vengin B. Zoramthanga (B. Sena) hmangin goal khung mah se F. Lalremsanga hmangin Lengpuiin an sut. Penalty shootout-ah Lengpui 'hero' Remsanga chuan penalty khung loin 'zero'-ah a tla thla a, midang zawngin goal khung vekin Armed Veng tan penalty specialist Hlutea'n chakna goal a khung.

An inrem uluk
Lengpuiin tlarhnung ho turin India international Lalchhuanmawia chu defence laiah an din tir a, tlarhma lamah an player neih ṭhat Remsanga, Rokima, Lalremkima leh Larry Lalrinawma te an dah a, midfield-ah veteran midfielder Rohmingthanga leh captain Joe Zoherliana te an awm.

Armed Veng lamin first leg-a an chhawr theih loh Lalchhanhima (Chhanchhana) bul an ṭantir nghal a, Vanlalduatsanga chu hmatawngah dahin tualchhung player ṭha Lalfakzuala leh Lalmuanzova bakah ATK Reserves R. Lalhriatzuala ten an thlawp a, midfield laiah Hlutea leh Chhanchhana te an awm ve bawk. Tlarhnungah veteran defender B. Sena'n a ho a, MPL7 Under 18 best defender Saidingliana nen an inkawp.

Bul ṭan fuh
Lengpui tan Rohminga thluak a la fim reng a, Armed Veng tlarhnung muthlu hmu fuhin Rokima a pe a, minute sarihnaah hma an hruai nghal.

Armed Veng an chet theih loh avangin first half a nung tawk lo. Second half ṭantirhah pawh Lengpui bawk chu bul ṭan ṭha an ni a, Remsanga ball pek ṭha zet chu Rokima'n la lutin Armed Veng substitute keeper KC Vanlalruatdika'n ṭha zetin a dan sak.

Goal lut ngat ni se halftime-a zai rual ṭhup ṭhup Lengpui mipui thawm a ring lehzual ang a, Armed Vengin thawm nei mang loin Lammual an chhuahsan ang.

Thawnthu dang
Armed Veng an vannei a, minute 49-naah Lalchhanchhuaha handball vanga an penalty hmuh chu Hlutea'n goal-ah chantirin beiseina thar an nei a, player leh mipui an harh thar a, inkhel a nung sawt.

Lengpui tlarhnung an talbuai avangin minute 60-naah freekick an chawi a, ṭum dang anga khel ṭha lo Fakzuala chuan kawh zetin goal-ah a khung. Second half minute 15 chhung lekin inkhel a danglam a, Armed Veng chu dinhmun ṭha zawkah an ding.

A hmuhnawm tulh tulh
Hun pangngai a hmuhnawm tluan a, extra time a hmuhnawm lehzual. Armed Veng substitute Chhuanawma'n chance ṭha bik a hlah a, Lengpui keeper Sumeon Lalremruata'n a dang ṭha takzet.

Second half-ah Armed Vengin goal an khung ta nge nge a, corner aṭanga ball kang lai chu B. Sena'n kawh zetin goal-ah a pet a, minute 113-naa goal hi dan rual a ni lo. Armed Veng mipuiin 'Lalpan thil ropui min tih sak' tih hla nen an chhunzawm a, mahse Lengpui an la tlawm lo.

Minute khat chiah a awm tawh tihin corner aṭanga ball kal chu Remsanga'n sang taka zuangin a tauh fuh chat a, Lengpui hlimna a thlen. Lammual boruak a nung a, tualchhung football fan-in 'thisen heh' an tih ang inkhel ngei chu phochhuahin a awm.

Chhandamtu Ruatdika
Armed Vengin halftime-ah first keeper Lalrintluanga inhliam vangin KC Lalruatdika an luhtir a, ani hi chhandamtu chu a ni. Ruatdika hian second half ṭantirha a dan bakah Lengpui tana pet hmasa ber Remsanga penalty pet a dang.

Armed Veng tan Muanzova, Duata, Chhuanawma, Chhanhima leh Hlutea ten an khung vek a. Lengpui tan Chhuantea, Clement leh veteran player Rohminga goal khungin awmzia a nei ta lo.

Lengpuiin ṭantu an nei ṭha a, player an nei ṭha a, amaherawhchu an vanneih miau loh avangin final an thleng zo lo. Armed Veng erawh an vannei a, chutihrualin vanneihna phenah hian an tawnhriat ṭha neih hmuh hmaih a thiang lo.

1st Leg - March 25, Thawhṭanni
Lengpui 1 - 0 Armed Veng
LEN : Lalrokima 45'
2nd Leg - March 27, Nilaini
Armed Veng 3 - 2 Lengpui
ARV: Lalbiakhlua 49'(P); Lalfakzuala 60'; B. Zoramthanga 113'
LEN: Lalrokima 7'; F. Lalremsanga 119'
Aggregate-ah 3-3 in an inhnehtawk. Penalty Shootout-ah Armed Veng 5-3 in an chak

Penalty Pet Dan
Armed Veng Lengpui
Lalmuanzova G F. Lalremsanga X
Vanlalduatsanga G Lalchhuanmawia G
C. Lalchhuanawma G Clement Zonunhlua G
Lalchhanhima G Rohmingthanga G
Lalbiakhlua G