UEFA-in Montenegro chhui dawn

Europe-a football thuneitu sang ber UEFA chuan Montenegro chu England nen Euro 2020 qualifier-a an inkhelh ṭuma an chet dan mawi lo tak avangin thubuai an siamsak.

UEFA chuan nungchang mawi lo avanga Montenegro chu an chhui thu an sawi a, chung zingah chuan chi inthliarna lam hawia an chet chu a chhan zingah a tel thu an sawi.

England-in 5-1 a hnehna an channa inkhelah hian fans ṭhenkhat chuan vunrawng vanga inthliarna lam hawiin Three Lions player ṭhenkhat chu an au el a, Raheem Sterling chuan a goal khung lawmin heng ho hi a chhanglet hial.

Montenegro coach Ljubisa Tumbakovic chuan inkhelh zawhah chi inthliarna lam hawi zawnga an fan-te an au awm a hriat loh thu a sawi a, England coach Gareth Southgate chuan chiang taka a hriat thu a sawi thung.

UEFA president Aleksander Ceferin chuan, "Thil duhawm lo tak a ni a, kan disciplinary committee ten hma an la lak dawn avangin thui tak sawi ka tum lo. Mahse hetiang mihring an lo la awm ve reng hi ka awih thei lo zawk a ni," tiin Montenegro fan-te a dem hle.