Serie A boruak a 'Hot' Ronaldo leh Lukaku hran zanah Ibra a rawn kir

Thlasik chawlh a zo a, Italy ramah chuan Serie A boruak nung takin a kal chhunzawm nghal. Thawhṭanni zan khan Cristiano Ronaldo-a'n Juventus tan hattrick siamin Cagliari lakah 4-0 in an chak, Romelu Lukaku chuan Inter Milan hnehna chanpuiin AC Milan tan Zlatan Ibrahimovic a inlan nghal bawk.

Champion lai Juventus leh Inter Milan ten match 18 an khelh tawhah point 45 ve ve an hmu a, nomawi inchuh boruak a sang. Antonio Conte enkawl Inter hian season riat chhung Italian football thununtu Juve chu nek chhuak an tum na hle - goal difference hmangin a chung zawkah an awm.

Allianz Stadium-a inkhelah mikhual Cagliari an ṭang rei thei viau, mahse European football khelh tum team hi second half-ah an ṭang zo lo - goal li ngawt an chhuah. Minute 49-naah Ronaldo chuan defender Ragnar Klavan ball pek sual chang fuhin goal hmahruai a khung.

Turin club lamin inkhel an thunun zui a, Argentine striker Paulo Dybala-a'n box chhungah mawi zeta ball a lakluh chu midfielder Marko Rog chuan lo ti tluin penalty a chawi a, goal hmahruai khungtu Ronaldo-a'n an goal hnihna khung nan a hmansak.

Italian champion lamin an la duhtawk mai lo, Portugal captain ball pek chu substitute Gonzalo Higuain chuan a khung. Hun tawp hma deuhin Ronaldo hian Douglas Costa siamsak chu goalkeeper Robin Olsen dan hman lohin a khung bawk a ni.

Kum 34 mi a ni tawh a, February 5 hian kum 35 a ni mai tawh dawn. Mahse, Cristiano Ronaldo hi goal khung turin a la ṭha tawk reng! Football a khelh hun chhungin vawi 56 zet hattrick a siam tawh a, a siam belh zel a nih pawhin a mak lo ang.

Real Madrid aṭanga pound maktaduai 99.2 a Juventus a zawm khan a kum nena chhutin a man a to titu an awm. Amaherawhchu, khelmual chhunga a chet dan leh a sulhnu en chuan a man hi a to lo. Tun hnai Serie A match a khelh hnuhnung pangaah goal a khung leh ta vek a ni.

Tun hmain Alexis Sanchez chuan Premier League, La Liga leh Serie A-ah te hattrick a lo siam tawh, Chile international hnuah Ronaldo hi hetiang ti leh thei hmasa ber a ni. Juve forward chuan, "A pawimawh ber zawk chu ṭha taka kan team kan khelh hi a ni," tiin a sawi.