Usyk-a'n Chisora a ngam

Ukrainian boxer rothap Oleksandr Usyk chuan boxer ṭha bik a ni tih pholangin Derek Chisora chu nimin khan point (117-112, 115-113, 115-113) hmangin a hneh. 

The SSE Arena, London, England-a inhnekah khawtual tlangval Chisora hian round 12 daih mah se Usyk-a'n inhnek a thunun a, chak a phu zawk. 

Kum 36 mi Chisora-a'n inhnek zawhah hnehna chang turin hna a thawh ṭhat tawk thu sawi mah se judge-ten a ngaihdan an ṭawmpui lo a, chak lo zawkah puan a ni.

 

Chisora-a'n vawi 42 fight-a hmachhawn vawi 10 a tlawmna chiah a ni a, vawi 32  hnehna a chang thung - Usyk erawh vawi 18 inhnek a hmachhawnah a la chak vek a, heng zinga vawi 13-ah hian a khingpui a knockout hial.

WBA, WBO leh IBF world heavyweight champion Anthony Joshua chuan inhnek hi a hmunah a en a, kum 33 mi Usyk hi WBO danah chuan Joshua WBO title kawl lai chuhpui tur a ni - Joshua hian kum 2021-ah WBO title hi a la kawl a nih chuan Usyk nen an inhnek ang. 

Cruiserweight-a WBA (Super), WBC, IBF leh WBO kawnghren lo kawl vek tawh Usyk hian October 2019 khan Chazz Witherspoon hmachhawnin heavy-weight-a a match hmasa ber a khel ve chauh a, a match hnihnaah boxer ṭha Chisora a hneh leh ta. 

Kum 2012-a Olympic champion ni thei Usyk chuan, "Heavyweight-a fiahna tak tak chu hei hi a ni - Chisora kha a lian ṭhain tawh a khirh em em bawk. Khatianga fight hautak kha ka beisei a, a aia hautak pawh ka beisei hial zawk. 

"Heavyweight-ah pawh champion nih ka duh a, world champion mai ni loin kawnghren zawng zawng kawl vek ka duh a ni," a ti a, cruiserweight ang thoa rorel a tum.