Chelsea khelh dan a lungawithlak

Nipui transfer-a sum hmang tam Chelsea-in season ṭantirhah sawisel hlawh deuh mah se an theihna an pholang ṭan. Inrinni zan khan Frank Lampard-a hoten Turf Moor an luhchhuah a, Burnley 3-0 in an sawp.

Hakim Ziyech-a'n Premier League-a bul a ṭan hmasak berah goal a khung a, Timo Werner-a'n goal khung tur a siamsak bakah Mason Mount-a'n goal a khung bawk. Blues-in goal thum a khung ringawt lo a, goal an chhuah lo.

Chelsea-in pound maktaduai 200 chuang player lakluh nan sum an hmang a, Burnley nena an inkhelh ṭuma player paruk hi mi thar an ni.

Timo Werner chu bench-ah dah zet mah se warm up-naah Christian Pulisic a inhliam avangin bul a ṭan ta tho. German forward bakah hian player thar Édouard Mendy, Ben Chilwell, Thiago Silva, Kai Havertz leh Hakim Ziyech ten bul an ṭan.

Tlarhnungah Kurt Zouma leh Reece James te an awm a, defence thlawp thiam bik N'Golo Kante chu a ṭhatna hmun takah dah a ni a, Blues academy chhuak Mason Mount leh Tammy Abraham ten bul an ṭan bawk.

Chelsea tana bul ṭantute te zingah kum 36 mi Silva chu upa deuh mah se kum 30 tling dang an awm lo a, player 11 kum chawhrual hi kum 25 leh thla hnih lek a ni.

Lungawina chu

Burnley forward Ashley Barnes-a'n inkhelh ṭantirhah chance ṭha bik a nei a, keeper Mendy chiah a hmachhawn hnuah a pet over. Chelsea-in Turf Moor-ah football mawina an lantir zui a, Clarets-in Silva hoa inrem Blues tlarhnung an tibuai tawh lo. Mualneitu hian goal zawnah vawi khat mah an pet lo a, a langsar lo chinah Kante-a a ṭangkai lehpek hle.

Chelsea tlarhnung ten an tih tur an ti a, tlarhma lam pawh an che ṭha. Goal thum khung tur hian vawi 14 zet goal-ah an pet a, goal zawnah pawh vawi kua zet a kal. Minute 26-naah Ziyech-a'n goal hmahruai a khung a, Burnley keeper Nick Pope rin loh lamah ṭha zetin a pet goal.

Blues dinhmun tih ṭhat nan Mount-a corner pet chu Zouma-a'n minute 63-naah tauh goal a, minute 70-naah Werner-a'n cool takin chak nemnghehna goal a khung. Chelsea-in nuam sa takin an khel a, mual vei lama Ben Chilwell che vel chuan mit a la hle. English left back Chilwell-a cross chu substitute Olivier Giroud-a'n a tlawh lut leh a, offside vangin pawm a ni lo.

Chelsea hi an tlarhnung phui loh vangin season ṭantirah sawisel an hlawh a, tunah erawh match li chhung a zawnin an cleansheet tawh. Keeper Mendy phei chu inelna hrang hrangah match nga chhung goal a chhuah tawh lo a, a record hi a ropui hle.

Chelsea manager Frank Lampard chuan, "Kan khel ṭha hlein ka hria. Minute khatna aṭanga a tawp thleng khan passing ṭha tak tak ka hmu a, hmasawnna ka hmu. Goal kan venhim dan pawh a lungawithlak. Ziyech-a chungah beiseina sang tak ka nei a; ball pass, dan, cross leh a che vel aṭangin team tichak theitu a ni tih a chiang a ni," tiin a lungawi thu a sawi.

Blues hian November 4, Nilaini zan dar 1:30 hian Champions League-ah Rennes an mikhual dawn a, November 7, Inrinni zanah Sheffield United an hmachhawn leh ang. Europe inelna sang berah hian point li hmuin an group-ah pakhatnaah an awm a, Premier League-ah point 12 hmuin palinaah an awm bawk.