Bundesliga hmahruaitu Bayern Munich An hnungah Dortmund an awm thung

Bayern Munich chu an awm hmun pangngaiah an awm leh ta. German champion hian Cologne 2-1 a hnehin table hmahruaitu an ni a, an hnuaiah hian an point hmuh zat ang tho hmutu Borussia Dortmund an awm ve bawk.

Inrinni zan inkhel dangah Dortmund chuan khualmualah Arminia Bielefeld 2-0 in an hneh ve bawk a, team lian pahnih hian league nomawi an inchuh chhunzawm leh dawn tih a chiang.

RB Leipzig erawh Manchester United laka an mualpho hnuah Borussia Monchengladbach lakah 1-0 in an tlawm a, pakhatna aṭangin pathumnaah an tla thla.

Bundesliga champion tan Thomas Muller-a'n penalty aṭangin goal hmahruai a khung, defender Marius Wolf-a'n forward Serge Gnabry laka a penalty chawi chu German international hlui hian season kal lai a league goal li nan a khung.

Hansi Flick-a nauten inkhel an thunun chhunzawm, Arsenal player hlui Gnabry-a'n chawlhlawk hma chiahin an goal hnihna a khung, hun tawp dawna Dominick Drexler khungin Cologne mualpho tur a hliahkhuh zo lo.

Kum 31 mi Muller-a'n Bundesliga bikah a match 260 zet a team a chakpui ta, goalkeeper ropui Oliver Kahn a nihrual ta chiah - harsa vak loin a khum ngei dawn tih a hriat nghal. Muller chuan, "Inpekna nen kan khel a, a rah kan seng," a ti.

Bayern Munich hian Thawhlehni zanah Champions League khel turin RB Salzburg an lenchilh zui dawn, manager Flick-a'n tun hnaia match an ngah avangin player siksawi a ngai tih a hria a, striker chuam Robert Lewandowski chu Cologne lakah chawlhtir a ni.

League match hmasa panga aṭanga goal 10 khung thei Lewy tel lo pawhin Bayern lam hi goal hmaah an hriam, forward Gnabry leh Leroy Sane an khel hmuhnawm. Manchester City player hlui hian goal khung chiah lo mah se team tan a ṭangkai hle.

Flick chuan, "Goal khung belh ni ila chuan nuamsa taka chak tur kan ni, goal kan neih belh loh avang khan a harsat phah deuh. Mahse a pumpui thlir erawh chuan point thum hmuh kha kan phu. League bakah UCL match hautak a awm reng avangin player ṭhenkhat pawh an chawl zauh zauh ang," a ti.

Inkhel dangah Dortmund pawhin an striker chhuanvawr Erling Haaland chu hah-chawlhna hun an pe ve tho a, defender Mats Hummels goal hnih hmangin Arminia Bielefeld an hneh.

German international hlui Hummels hian goal hnih khungin a team chakpui mah se hliam a tuar, minute 86-naah thlak a ngai. Dortmund forward Julian Brandt chuan, "A dam thuai ang, match lehpekah a inlan ka ring," a ti.

Dortmund hian Champions League lamah Club Brugge chu Thawhlehni zanah an hmachhawn zui nghal dawn a, defender pawimawh Hummels hi a inlan thei lo a nih chuan channa lian tak a ni ang.