Bayern defender thar Lucas Hernandez

German champion Bayern Munich chuan season thar an thlir a, an tlarhnung an thuam chak zel - Atletico Madrid aṭangin Lucas Hernandez chu an club player manto ber ni turin pound maktaduai 68 zetin an lalut; France international hian Allianz Arena-ah kum nga cham turin contract a ziak.

Kum 23 mi Hernandez hian 2018 World Cup-ah khan an ram a champion pui a, July 1 aṭangin German club tana a contract hi a inṭan ang. Hernandez-a'n world champion a nih pui defender Benjamin Pavard chuan nipui hunah Bayern hi pan turin inremna an ti fel tawh bawk.

Club ṭha
Bayern Munich tana medical a neih laiin Hernandez hian a khup vei lamah hliam a nei tih hmuhchhuah a ni a, Nilaini khan zai nghal niin hun rei tak chhung chu chawlh a ngai lo tura ngaih a ni.

A club thar chungchang sawiin Hernandez chuan, "Ka football career chhunga hun pawimawh tak a ni, Bayern Munich hi European mai ni lo khawvela club ṭha berte zinga mi a ni. Nomawi chawi theih zawng zawng beisei thei tura Bayern ka zawm thei hi ka lawm," a ti.

Hernandez hi left back a ni a, tlarhnung laiah a chhawr theih bawk. Atletico tan La Liga match 67 khel tawhin, Spanish club tan hian Europa League leh Super Cup a chawi tawh bawk.

Bayern sporting director Hasan Salihamidzic chuan, "Lucas Hernandez hi khawvela defender ṭha berte zinga mi a ni a, world champion a nih bakah tawnhriat a ngah tawh bawk, ani kan lalut thei hi a lawmawm hle. France player ropui dang kan kawl tawh ṭhinte ang bawkin min ti chaktu a nih ngei ka beisei," tiin a sawi.

France tan Hernandez hian match 15 chauh a la khel a, mahse tun hnaiah erawh rinrawl a ni. Russia-a World Cup nomawi an chawi ṭum khan match zawng zawngah a inlan kim vek a ni.

Fahrah chu...
Marseille, France-ah February 14, 1996 khan Lucas Hernandez hi a piang a, a pa Jean-Francois Hernandez hi football khel thiam, defender tharum ngak tak niin French club hrang hrang bakah Atletico Madrid tan a khel bawk - 2011 June thla khan Fernando Torres te nen an inkhel ho hman hial!

Mahse, a pa hian Lucas Hernandez leh a nau Real Madrid defender Theo Hernandez te chu kum nga leh kum li mi chauh an nih laiin a chhuahsan a, heta ṭang hian an inbe zui tawh lo.

Hernandez-a nu Laurence Py chuan, "Kan chanchin chhungril tak hre lo chuan a pa hnung zuiin footballer ṭha tak an ni maiah an ngai, mahse chutiang maia awlsam chu a ni lo," tiin a fapa pahnih enkawl puitlin chu atan thil awlsam a nih loh thu a sawi.

An naupan lai chanchin sawiin Lucas Hernandez chuan, "Naupang dangte angin pangngai takin hun kan hmang ve lo. Pa tel loin hun kan hmang a, ka neih chu ka nu leh unaupa a ni mai. Ka nuin hna a thawh loh chuan eitur kan nei lo a ni mai a, ka pu min puihna leh kaihhruai

ṭhin danah kan lawm hle.

"Hringnunah hian hun harsa ka paltlang tawh a, chu chuan rilru paukhauhna leh tumruhna min pe. Kan thil tawrh hi a ṭha zawnga kan hmang a nih chuan rah duhawm a chhuah thei, tun hun ka thlen theih chhan pawh a ni," tiin a sawi.

France tlangval
Kum li mi chauh an nih laiin a nu hoin Spain-ah an pem, France leh Spain khua leh tui nihna a neih avangin ram pahnih tan hian a khel thei a, a pianna ram tana khelh a thlang - thutlukna a siam sual lo, kum 23 mi chauh a nihin world champion a ni der tawh a, hmabak eng tak a nei mek bawk.

Bayern Munich-ah hian France player ṭha tak tak an lo awm tawh ṭhin, tun dinhmunah pawh Hernandez leh Pavard te hma hian Frank Ribery, Kingsley Coman leh Corentin Tolisso te an awm mek avangin German khawpuiah a mikhual dawn lo.

World Cup-ah khan hliam vangin Benjamin Mendy leh Djibril Sidibe te hliam vangin an khel mumal thei lo, mahse player pahnih buaina hi Hernandez leh Pavard te tan chanchinṭha a ni thung, khawvel hmuhah an ṭhat zia an lantir a ni.

Les Bleus coach Didier Deschamps chuan, "Player dang pahnih aiin Hernandez leh Pavard te pahnih hi chu an ṭha zawk, ball kang leh a lir ven kawngah an ṭha hle. An tlan chak a, thahrui an ngah avangin nileng pawhin an tlan thei ang," tiin a naute pahnih a dahsang hle.

Bayern Munich hian indinthar an tum tih a chiang a, an player thar Hernandez leh Pavard te hi player ṭha tak an ni. Mahse, anni pahnih khelhna hmuna tlan thiam Joshua Kimmich leh David Alaba te an nei sa bawk - eng tiangin nge Bayern hmel thar hi a awm dawn tih chu hmuh chakawm tak a ni.