Halep-i'n number 1 nih a hnaih

Simona Halep chuan world number 1 nihna hauh leh turin match khat chiah chak a mamawh tawh. Romanian nula hian nimin zing khan Wang Qiang chu 6-4, 7-5 a hnehin Miami Open semifinal a inhlangkai.

Seeded pathumna Halep hian set khatna chu harsa lo takin a la thei. Set hnihnaah erawh 5-1 in a hnufual hman, mahse game hnuhnung paruk la zawn vekin huaisen takin hnehna a chang.

Hmeichhe tennis world number 1 ni lai Naomi Osaka chu Australian Open hnuah a khel ṭha lo a, world number 3 Halep hian Miami Open-ah hian final a lut phak a nih chuan season hmasa lama a hun hman tawhna a chung berah a awm leh dawn a ni.

Kum 27 mi Halep chuan, "Ka coach khan hmanhmawh lutuk lo turin min ti a, dawhthei taka nghak turin min fuih. Thurawn ṭha tak ka dawng a, inrintawkna ka neih let bawk avangin ka chak hram a ni," tiin a sawi.

Halep hian break point a hmuh vawi riat zinga ṭum sarih a hmang ṭangkai thei a, vawi 24 winners a neih theih laiin a khingpui Chinese nula Wang erawhin vawi 14 bak a vaw chhuak ve lo a ni.

Quarterfinal inkhel dangah Czech Republic nula pahnih an inkhel a, tawnhriat ngah zawk Karolina Pliskova chuan Marketa Vondrousova 6-3, 6-4 a hnehin a tlang. Pliskova hian Halep a hmachhawn leh ang.