Indian Super Cup final round khel dawn
I League club ten buaina siam mah se All India Football Federation chuan I League club hnuchhawnin AIFF Super Cup chu ruahman sa angin a kaltlangpui dawn a, zaninah final round khelh a ni dawn.
Indian Super League leh I League club ten an khelh tura ruahman Super Cup hi a tirah I League club, AIFF laka lungawi lo ten an khel duh lo a, inkhel duh lo zingah Aizawl FC an tel.
Mizo club bakah hian Minerva Punjab leh Gokulam Kerala FC-te chuan Super Cup-a an match tur hi an khel lo bawk a, I League club dangte nuar ve tho mah se final round aṭanga inlan tur an nih hlawm avangin an buai ve hman lo.
I League club te hian a hnuah Super Cup khelh duh leh mah se AIFF lamin qualification round chu neih ṭhat leh chi-ah a ngai lo a, zanina inlan tur Chennaiyin FC pawh hi Aizawl nena inhmachhawn tura tih kha an ni - Mizo club zarah final round an lut.
Mangṭha Super Cup
Aizawl FC, Minerva Punjab leh Gokulam Kerala FC-te chu I League club zingah Super Cup qualification round khel tur an ni a, mahse I League club ten AIFF president Praful Patel dawr an tumna kawnga innawrna kal zelah an inlan duh lo.
Club pathum hi an inlan duh loh avangin an hmachhawn tura tih Pune City, Delhi Dynamos leh Chennaiyin-te chu final round luta puan an ni a, hemi hnu hian AIFF president Praful Patel chuan I League club aiawhte hi April 10 leh 15 inkarah titi pui a remti.
AIFF-in an thil phut zinga langsar tak pakhat a tih hlawhtlin sak avangin I League club-ten Super Cup hi khelh loh an pawiti ta lo a, a pawi ber erawh qualification round a liam hman.
Qualification round khelh
ṭhat leh chu I League club lam rawtna a ni a, mahse hei hi AIFF chuan awlsam takin a pawm sak thei ngawt bik lo - club pathumin 'Mangṭha Super Cup' an tih a ṭul phah ta.
A thlawn mai maw
AIFF hian national competition atan dan khauh tak a nei sa a, 'walkover' avanga inkhel tura ruahman sa an khel lo a nih chuan a inlan thei lo team zawk kha chaka puan an ni a, ngenna awm mah se khelh nawn theih a ni lo.
Aizawl FC leh club dang pahnihten an duhthlanna ngeiin Super Cup an khel lo a, hei vang hian AIFF tan pawm theih an ni tawh lo - ISL club pathum chuan dan angin final round hi an khel dawn.
I League club zingah Mohun Bagan chuan an thawhpui club dang pathum ten Super Cup an khel thei lo bik tur hi an hrethiam lo a, qualifier hi khel leh ngei turin AIFF hnenah dilna an thlen nawn.
Mahse, an dinna ngaiah AIFF an ding nghet tlat a, zaninah Aizawl FC-in an hmachhawn tak loh Chennaiyin FC chuan ISL club tho Mumbai City nen final round (last 16) match hmasa ber an khel dawn ta a ni.
Engtin zel?
Super Cup hi hmun khatah khelh a ni dawn a, Odisha khawpui Bhubaneswar chuan inelna hi a thleng. Match zawng zawng hi stadium pakhatah khelh tur a ni a, mipui 15,000 lenna Kalinga Stadium-ah an khel ang.
Inelnaah hian ISL leh I League-a parukna chin ve ve team 12-te chu last 16 lut chiang an ni a, a hnuai lama awm club pali ve vein qualification round aṭangin bul an ṭan.
I League club-te an nawrh avangin qualification round-ah hian match khat chiah khelh a ni a, AIFF enkawlna hnuaia awm Indian Arrows chuan Kerala Blasters chu 2-0 in an hneh.
Qualification round aṭanga inkhel ngei chunga last 16 lut chu Arrows chiah hi an ni tihna a ni. Final round hi April 3-ah khelh zawh a ni ang a, April 13-ah final khelh a ni ang - inkhel hi Star Sports Network, Hotstar leh Jio TV-ah te a en theih ang.
A chiang chuang lo!
I League club ten qualification round khelh ṭhat a nih chuan an vaia inlan an huam thu an sawi a, mahse AIFF-in a pawm miau loh avangin I League club inlan tur hi final round-ah pawh a la chiang chuang lo.
Chennai City chu AFC Champions League khel tur an nih avangin AIFF hriatpuina an mamawh a, Super Cup khel lo ngam chi an ni lo. East Bengal-in an reserve team an khelhtir dawn nia sawi a awm a, Mohun Bagan-in he thu buatsaih lai hian thuchiang an la nei lo.
I League club dang zingah Churchill Brothers, NEROCA leh Real Kashmir te chuan Super Cup khel turin player hming an thehlut tawh bawk.