Hamilton-a'n Ferrari a hlau lo

Formula 1 driver cham­pion lai Lewis Ha­mil­­ton chuan Pathianni za dar 8:40-a tlan tur Bahrain Grand Prix a thlir lawk a, an elpui Ferrari chu an thawhchhuah ring mah se an laka hnehna chang turin inrintawkna an neih thu a sawi.

Season bul ṭanna Australian Grand Prix-ah Mercedes an che ṭha a, mahse pre season an hman dan aṭanga chhutin Ferrari hi car nei ṭha an nih avangin boruak an nei lian - tun kar tawp hian an che fuh lo leh a nih erawh chuan inenfiah an mamawh hle ang.

World champion vawi nga ni tawh Hamilton chuan, "Australia-a kan chet dan khan mitin a barakhaih ngei ka ring, kan elpui Ferrari nen kha­tiang tak khan kan inthlau ang tih kha kei ngei pawhin ka ring bik lo.

"Keini lam chuan kan hna ṭha takin kan hlen thei a, team dang hi tun hma aia ṭha zawkin an rawn tho chhuak ngei ang tih ka ring. Hnehna chang turin kan team pawh kan inbuatsaihna a ṭha tawk," tiin a sawi.

Bahrain GP hi Ferrari chetṭhat tawh ṭhinna hmun a ni a, tun hnai season hnih chhung chu Sebastian Vettel-a'n hnehna a chang. World champion vawi li ni tawh Vettel hian a zawna a vawi thum nan chak a tum dawn a ni.