India player an che fuh

Badminton inelna Indian Open khelh mekah Nilaini khan tualchhung player an inlan hnem a, player langsar an chak karah tun hma lama mi hriat hlawh lo Subhankar Dey chuan world number 7 Tommy Sugiarto a hneh.

K. D. Jadhav Hall, Delhi-a in­khelah Subhankar hian Sugiarto hi 14-21, 22-20, 21-11 a hnehin second round a inhlangkai a ni. Dey-a hian inrintawkna a ngah a, game hmasa ber hloh mah se chiai miah lohin game hnuhnung pahnih a khel thei a ni.

Beisei loh result dang lian tak kan hmuh chu H. S. Prannoy-a'n seeded pariatna Thai Kataphon Wancharoen lakah 14-21, 21-18, 21-14 a hnehna a chang chu a ni. Chak tura rinkai Kidambi Srikanth erawh Wong Wing Ki Vincent nen game hnuhnung ber an khelh laiin 11-17 in hniam hman mah se 21-16, 18-21. 21-19 in a tho chhuak.

Hmeichhe singles lamah Saina Nehwal a inlan loh avangin PV Sindhu chu India innghahna a ni. Olympic silver medalist Sindhu hian Mugdha Agrey chu 21-8, 21-13 a hnehin a match hmasa berah harsatna liantham a tawk lo.