Vawiin tlai dar 2:00-ah NECS Cup Final Armed Veng Vs Republic Veng
Inkhelh thiam leh khelmual nei veng ni bawk pahnih Armed Veng leh Republic Veng ten vawiin tlai dar 2:00 hian NECS Cup 2019 final an khel dawn.
Tualchhung football man thiam chin chuan a hmuhnawm dan tur an hrethiam dawn a, veng pahnih ṭantu aṭangin khelmual chhehvel mawi tham an pun khawm beisei a ni a, neutral supporter an tam bawk chuan Lammual khat tlat mipui an pungkhawm thei ang.
Sulhnu chu
Armed Veng hi 2015 NECS Cup champion an ni a, Aizawl DFA buatsaih inelnaah hian vawi thum final an lut tawh a. Veng/Khua inelna ngaihhlut dang CYMA Football-ah vawi nga champion tawhin nomawi chawi ngun ber an ni a, tualchhung football-a Armed Veng sulhnu hi chhuan tham a tling.
Republic Veng pawh hian kum 2004 khan Inter Village Football leh 2005 CYMA Football-ah an champion avangin veng inkhelh thiam sawi apiang an hming hmaih a ni ngai lo. Hei bakah hian 2017 khan NECS Cup last 32-ah final-a an khingpui tur Armed Veng chu penalty shootout-ah an hneh bawk.
Goal khungtu
Armed Veng hian final thleng tur hian match ruk an khelh tawhah goal 16 an khung tawh a, player parukin goal an khung tawh. Mizoram Police forward Lalfakzuala leh midfielder Lalbiakhlua te chu an player neih ṭhat a ni a, goal nga ve ve an khung tawh.
Fakzuala hi MPL hnuhnung berah top scorer a ni a, Mizoram tan vawi tam a inlan tawh a, Armed Veng innghahna a ni a. Mak ang reng tak erawh Lengpui nena hma tawnga an hman Vanlalduatsanga leh winger tlan chak Lalmuanzova ten goal an khung lo.
Republic Veng tan F. Lalrinpuia chu hming langsar ber a ni a, ani hi MPL-ah season khat chhungin top scorer, best forward leh best player chawimawina dawng vek thei a ni a, Armed Veng rum ṭhaih tura an hmanraw pawimawh tur niin tun inelnaah hian goal li a khung tawh.
Republic Veng tan hian Lalnunzira (4), Malsawmdawngliana (3) leh Lalhriatpuia (2) ten goal an khung ve tawh a, tun inelnaa hian goal 14 an khung tawh a ni.
En châkawm
Armed Vengin sulhnu an nei ṭha a, chutichung chuan coach Lalbiaksanga Colney chuan, "Final-ah chuan engkim a dang. Inkhel a ṭang em em ang a, tumahin an duh danin an khel dawn lo," tiin a sawi a, tawnhriat nei ṭha coach thusawi hian ngaithuah a ti thui hle.
Amaherawhchu tum mumal erawh an nei dawn a, inkhel hmuhnawm lantir turin Armed Veng hian tawnhriat nei ṭha Fakzuala, Hlutea, Simon Lalruatkima, Muanzova leh Duata te thlawp turin rawlthar ṭha Saidingliana, Lalchhanhima Sailo, C. Lalchhuanawma leh R. Lalhriatzuala te an nei a, attacking football khel turin an ṭha tawk.
Republic Veng lamah Valpuia hming a langsar a, chutihrualin he team-ah hian Paul Ramfangzauva, K. Lalnunzama leh Lalruatfela te an tel tih hriat a ṭha a, goalkeeper RS Lallawmzuala hi tualchhung goalkeeper ṭha zingah hmaih theih a ni ta lo. Ramhlun South nena Lalnunmawia goal khung tur a dan chu save ṭha bik a ni a, Lawma hian Armed Veng nen an intum hnuhnun ber ṭumin penalty vawi thum a dang a, tun ṭum inelnaa Ramhlun North an hneh ṭumin penalty vawi thum tho a dang.
Republic Veng coach PC Lalnunsiama chuan, "Kan duh chu nomawi a ni a, kan theihna zawng zawngin kan khel ang. Armed Veng hi team ṭha tak ni mah se Republic Veng mipui ṭanpuina nen chuan kan hneh thei a ni," tiin Vanglaini a hrilh.
