Novak Djokovic a tlawm

Mipa tennis world number 1 Novak Djokovic chuan Vienna Open khelh laiah a ngam loh a tawng, Serbian star hi Lorenzo Sonego lakah 6-2, 6-1 a chak loin quarterfinal a paltlang zo lo.

Season kal laiah Djokovic hi player khel ṭha tluang ber tia chhal ngam a ni. US Open an khelh thleng khan hneh loh a tawng lo, mahse New York khawpui aṭangin a 'puja' a fuh lo - a chet dan mawi loa vanga hnawl a ni.

French Open final-ah Rafael Nadal a ngam lo chiang hle a, beiseina sang tak nen Vienna Open khel leh mah se Italian tlangval, world ranking-ah pawh 42-na daih Sonego lakah chiang takin a tlawm leh ta.

Sonego chuan, "Tennis ka khelh tawh chinah chuan ka khelh fuh ber ṭum a ni hial ang, beisei phak baka ṭhain ka khel a ni," tiin world number a hneh chu a inchhuan thu a sawi.

Italian tlangval Sonego hian semifinal-ah Dan Evans chu 6-3, 6-4 in an hneh zui leh a, nizan khan seeded pangana Andrey Rublev nen final an khel zui a, he thu buatsaih lai hian result kan hre hman lo.

Tun hnaia khel ṭha tak Rublev hian semifinal inkhel dangah Austrain tlangval Dominic Thiem chu 7-6, 6-2 in a lo hneh ve thung a ni.