Quarterfinal-ah Roger Federer

Miami Open vawi thum champion tawh Roger Federer chuan nimin zing khan Daniil Medvedev hnehin quarterfinal a in vaw kai a, semifinal thleng tur chuan Kevin Anderson a paltlang leh a ngai ang.

Grand Slam vawi 20 champion tawh Federer hian darkar khat leh minute khat chhung lekin 6-4, 6-2 in hnehna a chang. Swiss star hian vawi 22 winners a vaw chhuak thei a, inkhel tawp lama game hnuhnung 11 zinga pakua a la thei a ni.

Kum 37 mi Federer chuan, "Inkhel ngaihnawm tak pakhat a ni, rei tak chhung point inchuha ball in pek kual a awm fo a, harsa tak taka intlantir chang a awm bawk," tiin Medvedev chu awlsam taka a paltlang bik loh thu a sawi.

World number 5 Federer leh a hmachhawn leh tur Anderson te hi tun hmain vawi ruk an inhmachhawn tawh, South African tlangval hian season hmasa Wimbledon khan hnehna a chang tih loh chu chak ni hmel a hmu lo a ni.