NECS Cup-ah mipui inelna Community Award

Veng leh khua inelna NECS Cup-ah mipui chanpual Community Award a awm. A tehfung tur chu player au phur ṭha leh hmun hma tifai ṭha a ni. Nikum khan Ramhlun South an champion a, Community Award hi an dawng bawk.

Kuminah hian kawr 'eng' ha Armed Veng leh kawr 'sen' ha Republic Veng an inhmachhawn dawn a, ṭantu nei ṭha ve ve an ni. Armed Veng hi Zomuanthanga Stand leh Zohminga Zote Stand-ah an ṭhu dawn a, Republic Veng hi K. Kawla Stand leh S. Malsawmtluanga Stand-ah an ṭhu dawn.

Armed Veng hian first leg-a Lengpui an hneh loh hnuin 'Veng Chhan Hnatlang' Lammualah an ko a, second leg-ah ropui taka an comeback ṭumin vengchhung mipui ṭhahnem takin an ṭawiawm a, an aurual ṭhat lai chuan an thawm a ring ṭha hle. Amaherawhchu, Armed Veng mipui zat leh tun hma thlirin a la tam tawk lo a, an la inkhawrh chhuah ṭhat a ṭul hle.

Republic Veng lamin 2008 CYMA Football final hnua a vawi khat nan veng leh khua football inelna lian thamah stage sang zawk an thleng a, semifinal-ah ringawt pawh mi ṭhahnem tham an tling khawm. Armed Veng ang thoin an theihna tak erawh phochhuah an la ni lo a, hmuhnawm tham pungkhawm tur an awm avangin final-ah erawh mipui tam zawk a beisei theih ang.

Community Award thlang tur lamin fans tam bakah an chet dan leh banner-te an thlir dawn avangin final hi a pawimawh dawn a, ṭum dang zawng aiin Armed Veng an eng a ngai a, Republic Veng lam an sen a ṭul bawk. A pawimawh leh chu hnu hma tihfai a ni a, Republic Veng lamin kumina vengchhung faina an kalpui chu Lammual lamah an chhunzawm a, an hnuhma an tifai zel. Armed Veng lam pawh faina kawngah chuan an ngaihtuah awm lo.