Man United-in Solskjaer an la nghet

Manchester United chuan Ole Gunnar Solskjaer chu manager nghet atan nimin khan an lalut a, kum thum chhung atan contract an ziahpui.

Kum 46 mi Solskjaer hian December thla khan Jose Mourinho a thlak a, hetih lai hian United hi Premier League-ah paruknaah awmin palina chu point 11 in an pha lo. Norwegian manager hnuaiah league match 13-ah vawi khat chiah chak loin palina Arsenal an phak lohna chu point hnih chiah a ni tawh.

Champions League-ah pawh United hian France champion Paris Saint Germain chu kim lo chunga hnehin quarterfinal an lut tawh bawk. Solskjaer hian Sir Matt Busby record khumin United manager zinga league match hmasa paruk chak thei hmasa ber a ni.

Manchester United executive vice-chairman Ed Woodward chuan, "December thlaa manager lai lawk a nih aṭang khan Ole hian engkim a thlak danglam. Result leh an khelh dan chauh a ni lo a, United-a player leh coach a nih tawh aṭangin club chhung a hrechiang a. Academy player-te a ring ngam a, chu chu club kalphung a ni. Hetiang zawng zawng thlir hian ani ngei hi kan mi zawn chu a ni," tiin an lung si thlapa thutlukna an siam thu a sawi.

Sir Alex-a thlaktute
Sir Alex Ferguson-a'n kum 2013-a manager hna a chawlhsan hnuah United hi Premier League club dang ang thoin manager an thlak zut a, Ole Gunnar Solskjaer hi manager nghet palina a ni.

Ferguson thlaktu David Moyes kha hun rei tak cham tura beisei niin kum ruk lai contract ziahpui mah se season hmasa berah ban a ni nghal. Hemi hnu hian Netherlands leh Barcelona hlui Louis van Gaal an la leh a, season hnih hnuah FA Cup-a an champion chungin an ban.

Nomawi duhin Jose Mourinho an lalut a, Portuguese manager hian League Cup leh Europa League nomawi chawi pui mah se season thumnaah point dinhmun thlirin champion aiin relegate an hnaih zawk a, hei vang hian Solskjaer-a tan a club hlui enkawlna hun remchang a inhawng.

Solskjaer leh a chhehvel
Solsjkaer hian a club hlui Cardiff chu 5-1 a hnehin Premier League-ah bul an ṭan a, an game kal hmang pawh Jose Mourinho hnuaia an inkhel nen chuan a dang hlak. Thla hnih thum chhung lekin club chhung boruak ṭha lo chu a rawn thlak danglam.

Mourinho nena buaina nei Paul Pogba chuan, "Coach hlim thei tak a ni a, player-te hnenah inrintawkna a pe. Manager nghet nih hi a phu a, club chhung a hrechiang a ni," tiin club thutlukna a thlawp.

United winger hlui Jordi Cruyff chuan, "Kar hnih thum lekah training hma hauhin engkim a thlak danglam nghal. A hnahthawh dan hian rilru lam a khawih a, player-te kawmin a nak nemah tak zen fuh a, an ṭhat dan berin a khelhtir thei a ni," tiin a fak hle.

United midfielder hlui David Beckham pawhin a teammate hlui chu nasat takin a fak bawk.

A la awlsam lo
Season a la tawp miau loh avangin Ole Gunnar Solskjaer hian a hna a la zo lo a, eng ang chiaha ṭha nge tih hi fiah a ni lo. Real Madrid-in an player hlui Santiago Solari chu manager nghet atana an lakluh hnuah an chefuh lo a, season tawp hmain an ban hial, Solskjaer pawh hian pressure thar a nei ang.

Manchester United hian tunah chuan Champions League khel pha china awm an inbeisei a, amaherawhchu an elpui hi Tottenham Hotspur, Arsenal leh Chelsea te an nih avangin a awlsam dawn lo.

Nomawi chawi theihna tura awlsam ber tura ngaih FA Cup aṭangin an tla tawh a, Champions League-ah erawh beisei nei mah se champion rinkai an ni lo. Hei bakah hian nipui transfer-ah Van Gaal leh Mourinho te angin player langsar lak kawngah huhang a nei lian ang em tih hi zawhna a la ni reng.