Barty a training leh ta

Hun rei tak chhung hri leng vanga a inkhelh ngam loh hnuah Ashleigh Barty chuan training a nei leh tawh a, tun season chhunga tournament a khelh hman tawh lo a nih pawhin kum tharah chuan ṭha taka khelh ngei a tum.

Australian nula hian February thla hnu lamah inelna a la hmachhawn leh lo, nomawi a kawl mekna French Open chu a khelh hun sawn ni mah se coronavirus kai a hlauh vangin a khel ta chuang lo.

Inkhel lo rei mah se Barty hian ranking point a hmuh san fal sa avangin a chung berah a la awm chhunzawm zel - season tharah pawh number 1 ni chungin kum bul a ṭan thei dawn tho tihna a ni.

Kum 24 mi Barty chuan, "Covid-19 zet chuan pawl leh mimalah nghawng a nei na ngei mai, a nihna takah chuan tun hma khan inkhelin kan zin kual hnem em em a, tunah zet chuan nunphung a danglam chiang hle.

"Inkharkhip vangin chawlhkar hnih chhung inah kan awm te a ngai a, a mak danglam duh hle. Hetianga rei hi a zawnin ina ka awm lohna chen pawh ka hre tawh lo," tiin hri leng vanga an zin chhuah loh chungchang a sawi.