Ronaldo a dam tawh

Cristiano Ronaldo chu Covid-19 lak aṭangin a fihlim tawh a, hri leng vanga a chawlh reng hnuah Juventus training a zawm leh thei tawh - nizan khan Spezia khelmualah a inlan tura ngaih a ni.

Kum 35 mi Ronaldo hi October 13 khan Portugal tana a feh chhuahna lamah hri a kai tih hriat a ni a, hri kai chung hian a chenna Turin khawpuiah a thlawk lut.

Natna a nei hran lo a, mahse endikna hmasa vawi thumah ngawt hri hi a la pai tih a lang. Ronaldo hian endikna khawl a rintawk loh zia social media lamah a tarlang hman hial a, tunah erawh natna a hneh ta.

A natna vang hian Serie A bakah Barcelona nen Champions League group match pawimawh an khelhah a inlan thei lo a, Nilaini zana Ferencvaros nen UCL an khelh leh hunah chuan harsatna nei loa inlan tura beisei a ni.