Atletico an chak; Barca mawina Messi

La Liga hmahruaitu Atletico Madrid chuan champion an la tum reng tih an pholan chhunzawm zel a, Nilaini zan khan an mikhual Huesca chu 2-0 in an hneh.

Atletico tan Angel Correa leh Yannick Carrasco-ten goal khat ve ve an khung a, Huesca lamin a chhanletna tur an nei lo - Atletico hian point thumin pahnihna Real Madrid an tlansan.

Diego Simeone-a naute chak thu hre sain Barcelona an inlan a, Real Madrid nena inhnehtawk hlim Getafe chu 5-2 ngawtin inkhelh an lo zirtir.

Barca tan Lionel Messi chuan goal hnih a khung a, Sofian Chakla (own goal), Ronald Araujo leh Antoine Griezmann-ten goal khat ṭheuh an khung bawk - Catalan club hian match khata khel tlem chungin pathumna dinhmun an luah mek.

Atletico beiseina
Nilaini zanah La Liga champion beisei zinga mi Real Madrid leh Sevilla-ten an khingpui ve ve an hneh a, Atletico tan chetsual chuan midang tana champion theihna kawng hawnna a ni.

He thu hre sa hian Atletico an inlan a, Huesca lakah zahngaihna an lantir lo - minute 39-naah Angel Correa chuan goal hmahruai a khung a, goal dang erawh a lut lo reng.

Minute 80-naah Carrasco chuan goal hnihna a rawn khung ve leh a, chak tur a chiang tawh - Atletico goal hnih hi Marcos Llorente siamsak ve ve a ni a, goal-a khung loh zanah pawh siamsaktuah a ṭang zel.

European Super League aṭanga an inhnuhdawh hnua an fan-te hnena ngaihdam diltu Atletico Madrid hian kum 2014 hnua a vawi khat nan league nomawi chawi an beisei mek a, Pathianni zan dar 12:30-ah league match khel turin Athletic Bilbao an lenchilh zui ang.

Messi bawk chu
Barca result-a ṭhat chuan Messi a che ṭha tihna a ni, tih chu a tak rama hmuh turin a awm zel a, Getafe lakah Messi leh Barca an hmuhnawm hle - Argentine forward hian minute riatna lekah ṭha zetin goal hmahruai a khung.

Mahse, minute li hnuah Getafe lamin an chhanglet nghal. Angel Rodríguez-a shot chuan Clement Lenglet-a per hnuah Barcelona goal-ah a lut a, Getafe an phur thar.

Minute 28-naah Getafe an chesual a, centre back Sofian Chakla chuan keeper David Soria a back pass, mahse, keeper hi a lo tlanchhuah hman avangin an lamah a lut.

Chawlhlawk hmain Messi bawk a inlar nawn - minute 33-naa a shot-in post-a per, let lehlam chu Messi bawk hian chang leh hmanin a pet goal a, 3-1 in chawlhlawk hman a ni.

A hming Messi
Chawlhlawk hnuah pawh Messi bawk a langsar - Getafe lamin minute 69-naa Enes Unal penalty hmangin beiseina nei ve mah se Messi an ngam thei lo a, Argentine forward hian minute 87-naah corner petin Ronald Araujo chuan 4-2 a an hmahruaina ni turin a lo tauh lut.

Barca-in an la duhtawk lo cheu - hun pek belh minute thumnaah Griezmann chuan penalty hmangin a khung ve leh a, 5-2 in Barca an chak. Barca tana penalty pettu chu Messi a ni a, mahse, hattrick siam theihna remchang a nei chungin Messi hian Griezmann-a kian a ni.

Kum 33 mi Messi hian tun season inelna hrang hrangah match 41 khelin goal 33-a khung tawh a, assist vawi 14-a nei bawk - Messi hian season 13 chhung chu a zawnin season tinin goal 30-a khung tling ziah!

Hei mai a ni lo. Messi hian kumin bikah goal 23 khungin assist vawi riat a nei tawh a, April ral hmain goal 31-a hlawh chhuak tawh tihna a ni. Messi-a che ṭha zel a nih chuan Barca-in champion an beisei zel ang.

Hmabak
Getafe nen an inhmachhawn hmaa European Super League-a an cham chhunzawm tur thu tichiangtu Barca hian Pathianni zan dar 7:45-ah league match khel turin Villarreal an lenchilh zui ang.

Barca hian league table-ah pathumna dinhmun an luah mek a, match khata khel tlem chungin hmahruaitu Atletico Madrid chu point ngain an phak lo mek.

Zanin dar 12:30-ah Real Madrid an inlan dawn a, Real Betis an mikhual dawn - Madrid khaw club hian khelh zat inangah point thumin Atletico an phak lo a, Barca aiin point hnihin an sang.

Sevilla chuan Pathianni zan dar 7:45-ah Granada an mikhual dawn a, he team hian point ruk chauha Atletico Madrid an thlauh avangin champion beiseina an la nei ve reng ang.