Chawlh tum hman Jesse Lingard

England midfielder Jesse Lingard chuan rilru lam harsatna avangin football aṭanga chawlhrih a tum hman thu a sawi. Kum 28 mi Lingard hian January thla khan loan hmangin Manchester United aṭangin West Ham a zawm a, Hammers tan hian Premier League-ah goal kua a khung der tawh.

Lingard chuan, "Football chawlhsan ni loin chawlh rih ka tum hman. Inkhel turin ka kal a, bench-a ka ṭhut kha ka lawm tawk em em a, ka rilru kha a dik lo a ni. Khelh ka duh loh chhan chu ka rilru kha a inpeih lo a, football ni lo thil dang ka ngaihtuah nasa a ni," tiin a sawi.

Lingard-a nu hian depression a nei a, nikum khan London-ah an enkawl. Hemi a nih avang hian Lingard hian a nau mipa leh hmeichhia a enkawl a ṭul phah a ni. Manchester United midfielder Lingard chuan, "Kum tluanin ka nu ka puih ka ngai a, inkhel turin ka rilru a inpeih lo. Manchester United-a club hotute ka harsatna leh ka nu harsatna ka hrilh a, min pui turin an inpeih reng a ni," tiin Man United a fak.

Man United manager hlui David Moyes-a'n Lingard a theihna a hria a, Hammer-ah loan hmanga la chhuakin a theihna tak a rawn lang chhuak. Lingard chuan, "Keimah chauh ni loin ka nu nen khawvel hmachhawn turin kan inpeih leh tawh a ni. Tunah chuan kan harsatnate kha kan hnu chhawn leh tawh a, football leh chhungkuaah rilru ka pe leh thei tawh," tiin a sawi.