Ka naute ka ringtawk - Pochettino

Paris St. Germain manager Mauricio Pochettino chuan season kal laiah hun pawimawh bik an tawn mek thu a sawi a, hlawhtlinna an chan ngei theih nan a naute a rintawk thu a sawi chhuak.

French champion hian Mauro Icardi-a hattrick hmanga Angers sawpin French Cup semifinal an lut a, cup inelna an hmachhawn ṭum hian Neymar leh Angel di Maria te inlan mah se Kylian Mbappe chu hahchawlhna hun pek a ni.

PSG manager Poch chuan, "Player tawnhriat nei ṭha tak tak kan kawl a, anni hian a naupang zawkte hnenah zirtirna ṭha tak an pe chhawng zel. French Cup, Ligue 1 leh Champions League lamah hlawhtlin kan tum.

"Hun pawimawh lai tak kan thleng chho mek a ni a, tun hunah hian nghing loa kan ding nghet tluan thei a nih chuan season tawpah kan nui thei ang," tiin a sawi.

Paris club hian zanin dar 8:30 hian league match khel turin Metz an lenchilh dawn. An elpui Lille leh champion tum zinga mi Lyon an inhmachhawn dawn a, anni pahnih zingah point hloh an awm ngei dawn vangin PSG tan dinhmun siamṭhatna hun ṭha a ni ang.